Össur: Íslendingar eiga fullt af öðrum vinum

Utanríkisráðherra segist vera hundfúll yfir aðgerðum bandarískra stjórnvalda gegn Íslandi vegna hvalveiða. Rök bandaríkjaforseta í málinu séu þjóðinni ekki boðleg. Hann segir þó Íslendinga eiga fullt af öðrum vinaþjóðum.

Barack Obama bandaríkjaforseti fyrirskipaði í gær að grípa skyldi til diplómatískra þvingunaraðgerða gegn Íslendingum vegna hvalveiða. Fyrirmælin eru í sex liðum en þau snúa einungis að pólitískum samskiptareglum.

Össur Skarphéðinsson, utanríkisráðherra, segir rök bandaríkjaforseta ekki boðleg. Össur segir langreyðarstofninn í suður höfum vera í hættu, en hann sé það ekki hér á norðurslóðum. Hann segir það vera grátlegt að verið sé að beita vísindalega vitlausum gögnum. Ráðherrann er því síður en svo sáttur með fyrirskipun Bandaríkjaforseta og segist vera hundfúll.

Össur segir það langalvarlegasta í fyrri hótun Bandaríkjaforseta hafa verið að beita viðskiptalegum þvingunum. Það verði hins vegar ekki gert núna og Össur segir hinar diplómatísku þvinganir sem gripið verði til skipta litlu máli.

Össur segir bandarísk stjórnvöld vera að stilla sér upp fyrir kosningar og með þessu sé verið að friða náttúruverndarsamtök. Það skipti hins vegar litlu máli því Íslendingar eigi marga aðra vini. Íslendingar verði að skoða hvort vilji sé til að leita annað, svo sem til Kínverja eða Rússa.