30. júní 2017 tímamótadagur í sögu Arsenal

Tími Arsene Wenger sem knattspyrnustjóri Arsenal gæti verið á enda eftir rúma tuttugu mánuði en enskir miðlar lesa það úr orðum franska stjórans að hann ætli að hætta með liðið þegar samningur hans rennur út.

Það er samt mikill hugur í Wenger og hann vill vinna enska meistaratitilinn áður en hann stígur frá borði.

Núverandi samningur Arsene Wenger við Arsenal rennur út 30. júní 2017 en hann hefur stýrt liðinu frá því í október 1996. Hann verður þá orðinn 67 ára gamall. Arsene Wenger gerði Arsenal að bikarmeisturum í sjötta sinn síðasta vor og vann um leið sinn níunda stóra titil með félaginu.

„Ég hef lent í mótlæti á tímum í þessu starfi en ég er ákveðnari sem aldrei fyrr. Ég var aðeins afslappaðri fyrir nítján árum en núna veit ég betur hvað þetta þýðir fyrir fólk. Ábyrgðin á mínum herðum er því enn meiri,“ sagði Arsene Wenger við Daily Telegraph.

„Ég er staðráðinn í því að gefa mig allan í starfið fram á síðasta dag samnings míns, koma liðinu aftur á toppinn og sjá til þess að þegar ég fer geti félagið gert enn betur. Það er mjög mikilvægt fyrir mig að skilja þannig við liðið að eftirmaður minn geti gert betur,“ sagði Arsene Wenger.

Arsenal vann ekki titil á árunum 2005 til 2013 en byggði upp frábæran leikvang og hélt sér allan tímann í Meistaradeildinni. Wenger væri ekki til í að fara í gegnum slíka göngu aftur.

„Ef þú myndir biðja mig um að gera þetta aftur þá væri svarið nei, leyfum einhverjum öðrum að gera þetta. Þetta var svo erfitt,“ sagði Wenger.  Hann er samt á því að það sé eitt mesta afrek hans sem knattspyrnustjóra Arsenal að hafa haldið félaginu í Meistaradeildinni á sama tíma og nær allur peningurinn fór í Emirates-leikvanginn.

Arsenal vann 3-0 sigur á Manchester United í síðasta leik sínum fyrir landsleikjahlé og er nú tveimur stigum á eftir toppliði Manchester City í öðru sæti ensku úrvalsdeildarinnar. Liðið hefur allt til alls til að vinna fyrsta meistaratitilinn frá árinu 2004.

„Við eigum aftur möguleika á því að vinna titilinn og það góðan möguleika. Vendipunkturinn í sögu þessa liðs var í janúar 2015 og ekkert annað félag hefur náð í fleiri stig á árinu 2015. Það segir okkur að við erum á réttri leið,“ sagði Wenger.