Pétur á Útvarpi Sögu um ummæli Bubba: „Ekkert áfengi hér“

Sú spurning sem hefur vakið hvað mesta athygli í dag er spurning Útvarps Sögu sem spyr hlustendur sína hvort þeir treysti tónlistarmanninum Bubba Morthens? Þegar þetta er skrifað segjast 453 treysta Bubba en 424 segjast ekki treysta honum. Hlutlausir eru 35.

Bubbi var allt að því orðlaus þegar Vísir bar þessa skoðanakönnun Útvarps Sögu undir hann fyrr í dag. „Hvað á ég að segja? Þegar heil útvarpsstöð ákveður að hjóla í mig af því ég er ósáttur við skoðnir þeirra. Hvað á ég að segja? Þetta er auðvitað galið,“ segir Bubbi.

Seinna steig hann fram á samfélagsmiðlinum Twitter þar sem hann lét eftirfarandi spurningu fram.

útvarp saga er með könnun treystir þú Bubba Morthens, næsta ætti vera er Arnþrúðr karlsdóttir fyllibitta

— Bubbi Morthens (@BubbiMorthens) October 9, 2015

„Hef aldrei talað illa um þennan mann“

Ekki hefur náðst í Arnþrúði Karlsdóttur, útvarpsstjóra Útvarps Sögu, vegna málsins. Pétur Gunnlaugsson, starfsmaður Sögu, svarar því þegar hann er spurður út í tilurð skoðanakönnunar Útvarps Sögu að Bubbi hafi sett fram ósönn og ærumeiðandi ummæli og niðrandi rógburð um Útvarp Sögu.

„Ég ætla ekki að endurtaka það, hann heldur þessu áfram. Ég hef aldrei talað illa um þennan mann eða neinn hér á stöðinni og ætla ekki að gera. Hitt er annað mál að hlustendur Útvarps Sögu geta metið það hvort þeir treysti honum eða ekki, og hvort þeir treysti því sem hann er að segja um Sögu. Við höfum aldrei verið að standa í neinum deilum við þennan aðila og ég ætla ekki að vera að gera það. Það kemur þá bara í ljós hver er afstaða þeirra sem taka þátt í könnuninni.“

„Ekkert áfengi hér“

Spurður út í skrif Bubba á Twitter og þá spurningu sem hann leggur til að Útvarp Saga eigi að spyrja hlustendur sína næst svarar Pétur. „Segir þetta ekki svolítið mikið um hann? Ég held að það geri það. Ég þekki Arnþrúði Karlsdóttur og og þekki hana betur en flestir aðrir. Hún smakkar ekki vín. Við vinnum hér, nánast alla daga. Hér er unnið frá morgni langt fram á kvöld. Það er ekkert áfengi hérna og hefur ekki verið. En hann leyfir sér þetta og þetta segir mest um hann sjálfan og hvernig hann hugsar. En hann er mjög viðkvæmur fyrir því að hlustendur eru spurðir hvaða traust þeir bera til hans.  Við erum ekki með leiðandi spurningu, menn ráða því hverju þeir svara. En við ætlum ekki að fara í einhverja skítadreifingu gegn honum jafnvel þó hann hafi gert það gegn Útvarpi Sögu.“

Bubbi bannaði nýverið útvarpsstöðinni að leika lög eftir sig eftir að stöðin hafði spurt hlustendur sína hvort þeir treysti múslimum. Nánar um það hér.