Ferðalangurinn Jüri komst úr landi

„Mig langar til að þakka öllum Íslendingunum sem ég hitti og kynntist á ferðalagi mínu um landið. Ég er þakklátur að hafa getað hjálpað fólki og hafa á sama tíma fengið aðstoð á ferðalagi mínu,“ segir eistneski ferðalangurinn Jüri Burmeister.

Lesendur Vísis kynntust Jüri í byrjun júlí. Hann var þá staddur í Reykjavík í leit að fari frá Íslandi en markmið hans er að ferðast í kringum heiminn á einu ári án þess að nota nokkuð fjármagn.

Jüri segist hafa fengið svar frá framkvæmdastjóra WOW Air, Skúla Mogensen, sem hafi sagst hafa heillast af sögu Eistans. Í framhaldinu hafi hann fengið boð frá upplýsingafulltrúa WOW, Svanhvíti Friðriksdóttur, og getað valið sér flug frá landinu. Hann hélt af landi brott á mánudaginn en áfangastaðurinn var Boston.

Yndislegur tími í Þórsmörk

Jüri hóf ferðalag sitt í Eistlandi í mars og mætti til Íslands þann 28. júní eftir vikulanga bátsferð frá Afríku. Hann ætlaði upphaflega aðeins að dvelja hér í nokkra daga. Úr urðu fimm vikur þar sem hann flakkaði um Ísland sem hann segist hafa notið vel.

„Þetta var í fyrsta skipti sem ég dvaldi í sama landi í meira en tíu daga,“ segir Jüri. Hann segir líf sitt hafa tekið breytingum á dvöl sinni á Íslandi, til hins betra.

„Það virðist vera satt að umhverfið sem fólk lifir í hafi mikil áhrif á hvernig við erum,“ segir Eistinn. Þannig séu Íslendingar fallegir eins og náttúran og með sterkan persónuleika í takt við erfiða veðurfarið sem einkenni landið.

Hann minnist göngu sinnar í Þórsmörk og tónlistarinnar sem hann hafi heyrt í formi vindsins og fuglasöngs. Yndislegur tími.

Eins árs tilraun

Jüri er sannfærður um að lífið eigi ekki að snúast um að þéna peninga. Við eigum ekki að vera upp á peninga komin.

„Ég horfði á foreldra mína, vini og í kringum mig og spurði sjálfan mig hvort ég vildi lifa svona eða hvort það væri einhver önnur leið. Ég ákvað því að gera tilraun til eins árs,“ segir Jüri og sú tilraun stendur yfir.

Eistinn segist hafa skrifað WOW Air bréf um mánaðarmótin og óskað aðstoðar. Hún barst skömmu síðar og er Jüri afar þakklátur. Hann segist stunda hugleiðslu sem sé lykilþáttur í að læra á sjálfan sig og lífið. Deilir hann myndbandi tengdu Amazon-skóginum þangað sem för hans er heitið og kveður að sinni.