Kolbeinn gæti spilað gegn Bournemouth

Kolbeinn Sigþórsson spilar mögulega sinn fyrsta leik fyrir franska úrvalsdeildarfélagið Nantes á morgun er liðið mætir Bournemouth í æfingaleik.

Leikurinn fer fram í Frakklandi á morgun en Kolbeinn hefur ekkert getað spilað með Nantes eftir að hann gekk til liðs við félagið fyrr í sumar vegna meiðsla í fæti.

„Kolbeinn æfði á þriðjudag en við vildum ekki taka neina áhættu með hann,“ sagði stjórinn Michel Der Zakarian í viðtali á heimasíðu Nantes eftir 4-1 sigur liðsins á FC Lorient á miðvikudagskvöld.

„Hann mun halda áfram að æfa og það gæti verið að hann komi við sögu í leiknum gegn Bournemouth á laugardag.“