Nýjustu vagnar Strætó gallagripir?

Kælibúnaður í nýjustu vögnum Strætó bs. hefur haft tilhneigingu til að ofhitna með þeim afleiðingum að hann hefur sprungið undan þrýstingi.

Þetta gerðist síðast í hádeginu í dag þegar stöðva þurfti vagn á Miklubraut eftir að rifa kom á kælikassa bílsins og rjúka tók úr honum.

Farþegar þurftu að yfirgefa vagninn meðan annar var sóttur til að koma þeim leiðar sinnar en að sögn vagnstjórans er þetta ekki fyrsta tilfelli sinnar tegundar í vögnunum – sem eru ekki nema ársgamlir.

Jóhannes Svavar Rúnarsson, framkvæmdastjóri Strætó bs., segir bilanirnar hafa verið einstök og afmörkuð tilfelli. „Við keyptum 40 svona vagna og þetta hefur bara komið upp í síðustu þrem-fjórum vögnum. Þetta er bara eitthvað gæðamál og þessir aðilar eru að kaupa fullt af íhlutum frá mörgum mismunandi framleiðendum. Í þessu tilviki þá virðast nokkrir kassar vera með eitthvað vandamál í síunni,“ segir Jóhannes.

Strætisvagnarnir eru af gerðinni Crossway LE og voru keyptir af fyrirtækinu Iveco bus á síðasta ári.

Jóhannes segir að Strætó bs. muni ekki bera neinn kostnað af viðgerðum eða íhlutakaupum vegna gallans en þessum bilunum fylgi ætíð eitthvað umstang, svo sem þegar sækja þurfi farþega með öðrum vögnum.

Hann bætir við að málið sé nú í höndum framleiðanda vagnanna sem skoði nú hvernig vinna skuli bug á ofhitnuninni sem virðist stundum eiga sér stað í kælikössum nýjustu vagnanna.

Strætó bs. hafi lagt mikla áherslu á að lausn finnist sem fyrst á málinu og hefur þrýst á framleiðandann í þeim efnum.

Jóhannes vísar því á bug að gerð hafi verið mistök við gerð nýjustu strætisvagnanna. 

„Strætó ræður þó ekki hvaða vagna það kaupir, það verður að bjóða út og kaupa ódýrustu vagnana,“ segir Jóhannes.