Ár liðið frá harmleik í háloftum Úkraínu

Tæplega þrjúhundruð karla, kvenna og barna sem fórust þegar farþegaflugvél Malaysian Airlines var skotin niður yfir Úkraínu fyrir ári var minnst víða um heim í dag. Flest bendir til að rússneskir hermenn hafi skotið flugvélina niður og hafa Hollendingar kallað eftir rannsóknarrétti á vegum Sameinuðu þjóðanna.

Einn mannskæðasti atburður flugsögunnar gerðist þennan dag fyrir ári þegar Boeing 777 farþegaflugvél Malaysian Airlines var skotin niður með eldflaug yfir austurhluta Úkraínu með þeim afleiðingum að allir 298 um borð fórust. Fólkið kom víðs vegar að úr heiminum en um 200 þeirra voru Hollendingar og Hollendingum að lokum falið að leiða rannsókn málsins.

Mark Rudd forsætisráðherra Hollands mætti til minningarathafnar í dag en margir viðstaddra höfðu með sér sólblóm sem hafa orðið tákn hildarleiksins þar sem flugvélin hrapaði niður á sólblómaakur á átakasvæðinu í Úkraínu.

„Dagurinn í dag er erfiður þar sem við lifum þessa atburði aftur. Það er ekki hjá því komist að minningarnar hellist yfir okkur. Um hvernig við fengum fréttirnar, hvar við vorum þegar við heyrðum þær. Þetta augnablik þegar dauðinn kom til okkar frá ókunnum stað í þúsundum kílómetra fjarlægð er frosið í tímans rás,“ sagði Rudd á minningarathöfninni þar sem nöfn allra þeirra sem létust voru lesin upp og ættingjar og vinir minntust ástvina sinna.

Á staðnum þar sem þotan hrapaði til jarðar minntust sendimenn Öryggis- og samvinnustofnunar Evrópu ÖSE þeirra sem létust með mínútu þögn í dag. Aðstoðaryfirmaður stofnunarinnar segir sorglegt að hugsa til þess að þar sem allt þetta fólk missti líf sitt, sé enn barist en um 6.500 manns hafa fallið í átökum aðskilnaðarsinna með stuðningi Rússa gegn stjórnvöldum í Úkraínu.

Í nýlegri skýrslu bandarískra yfirvalda er fullyrt að rússneskir hermenn hafi skotið flugvélina niður í misgripum fyrir úkraínska herflutningaflugvél. Hægt sé að sanna hvaðan flugskeytinu var skotið og að um rússneskt flugskeyti hafi verið að ræða. En Rússar hafa alltaf þvertekið fyrir að eiga aðild að málinu og segja úkraínska hermenn hafa grandað þotunni.

Félagar í ungliðahreyfingu sem styður Vladimir Putin forseta Rússlands lögðu rósir við hollenska sendiráðið í Moskvu í dag og vegfarendur sem spurðir voru út í atburðinn trúa greinilega fullyrðingum forsetans. En Putin hefur ítrekað sagt að engir rússneskir hermenn berjist í Úkraínu og engin vopn hafi verið send þangað.

„Ég held að Úkraínumenn hafi skotið flugvélina niður. Hundrað prósent. Það kemur ekki annað til greina,“ segir Vladimir verkamaður í Moskvu. Og eftirlaunaþegin Natalia var á sama máli.

„Að sjálfsögðu tel ég að Rússar hafi ekki átt nokkurn þátt í þessu. Flugvélin var skotin niður af fólkinu frá Maidan torgi (í Kænugarði). Ég myndi segja að það fólk hafi gert þetta. Það er gnægð sannana um það,“ sagði Natalia.

Rannsókn Hollendinga á gröndun flugvélarinnar er langt komin og fara þeir fram á að Sameinuðu þjóðirnar skipi rannsóknardóm í málinu.