Fimmtán börn slösuðust í fiskvinnslufyrirtækjum á síðasta ári

Vinnueftirlitið hefur ítrekað gert alvarlegar athugasemdir við öryggi og aðbúnað starfsfólks í fiskvinnslufyrirtækjum hér á landi.

Fimm stór fiskvinnslufyrirtæki eru í sérstakri athugun hjá eftirlitinu og mun Vinnueftirlitið beita harðari aðgerðum en síðustu ár og vinna í fyrirtækjunum verður stöðvuð ef öryggi er ekki í lagi.

Algengast er að ungt fólk slasist við vinnu og erlendir ríkisborgarar en fimmtán börn undir lögaldri slösuðust í fiskvinnslu á síðasta ári.

Þórunn Sveinsdóttir deildarstjóri hjá Vinnueftirlitinu segir það hafa heimsótt 109 fyrirtæki.

„Undangengin ár hafa verið mörg slys í fiskvinnslu. Heimsóknir og eftirlit skiluðu ekki þeim árangri sem vænst var eftir. Við sáum ástæðu til að fara á stúfana aftur.“

Slys í fiskvinnslu tengjast oftast vélum og tækjum og algengast er að fólk yngra en 25 ára slasist. Þórunn minnir á reglugerð um vinnu barna og unglinga.

„Börn mega ekki vinna við hættulegar vélar. Eða bera þungar byrðar, nefnir hún sé dæmi og segir mikilvægt að fyrirtæki útbúi áhættumat fyrir þau störf sem börn og unglingar sinna svo þau komi heil heim eftir vinnudaginn.“

Vinnuslys eru einnig tíð á meðal erlendra ríkisborgara.

„Erlendir ríkisborgarar hafa verið að slasast mikið og það skiptir máli að þeir fái fræðslu á því tungumáli sem þeir tala.“

Athugasemdir til fyrirtækjanna voru alvarlegar. Til dæmis var algengt að öryggisbúnaður á vélum og tækjum væri ekki í lagi. Færibönd væru opin og á þau vantaði oft neyðarstopp Víða voru opnir öxlar og öxulendar. Ástand og umgengni við fiskikör var verulega ábótavant og þá uppfylltu frystiklefar ekki öryggiskröfur.

Nú ætlar Vinnueftirlitið að grípa til harðari aðgerða.

„Við munum fara fram á að vélar verði stöðvaðar ef það hefur ekki verið bætt úr því sem farið hefur verið fram á.“