Komust út úr brennandi sumarbústað af sjálfsdáðum

Eldur kom upp í sumarbústað skammt frá Seljavöllum austur undir fjöllum upp úr miðnætti í nótt. Tveir menn voru í bústaðnum sem komust að sjálfsdáðum út. Þeir hlutu minniháttar meiðsl.

Allt tiltækt slökkvilið Brunavarna Rangárvallasýslu var kallað út og fóru 10 menn og fjórir bílar á staðinn.

Að sögn Gunnars Eyjólfssonar, varðstjóra hjá slökkviliðinu, var bústaðurinn alelda þegar slökkviliðið kom á staðinn. Um einn og hálfan tíma tók að slökkva eldinn en sumarhúsið er gjörónýtt auk bíls sem stóð við bústaðinn og varð eldinum að bráð. Þá komst einnig eldur í garðhýsi en það féll ekki og er því ekki ónýtt líkt og sumarhúsið.

Gunnar segir líklegast að kviknað hafi í út frá gasi. Gassprenging hafi orðið vegna eldunartækja en gas hafi líkast verið búið að leka út í einhvern tíma. Mennirnir hafi hins vegar ekki áttað sig á því með þeim afleiðingum að sprenging varð þegar þeir reyndu að kveikja á umræddum tækjum.