Páskaegg lækkað í verði hjá þremur verslunum

Páskaegg hafa lækkað töluvert í verði hjá Nettó, Bónus og Fjarðarkaupum frá því í fyrra. Þau hafa þó hækkað umtalsvert í verslunum Iceland, Víðis, Nóatúns og Samkaups-Úrvals. Þetta kemur fram í nýrri verðkönnun ASÍ.

Af þeim verslunum sem lækkað hafa verð hefur Nettó lækkað í tólf tilvikum af þrettán, Fjarðarkaup í tólf tilvikum af sextán, Krónan í níu tilvikum af fjórtán og Bónus í átta tilvikum af tíu. Á sama tíma er verð eggjanna að hækka hjá Iceland í fimmtán tilvikum af fimmtán, hjá Víði í fimmtán tilvikum af sextán og hjá Nóatúni í tíu tilvikum af þrettán. Aðeins í verslunum Hagkaupa er jafnoft um hækkun og lækkun að ræða milli ára.