Reykjagarður innkallar kjúkling vegna salmonellu

Reykjagarður hefur hafið innköllun afurða eftir að upp kom rökstuddur grunur um að salmonella hafi greinst í einum kjúklingahópi Reykjagarðs.

Í fréttatilkynningu segir að vörur með rekjanleikanúmerið 001-15-08-1-01 hafi verið innkallaðar. „Neytendur sem hafa keypt kjúklinga með þessu rekjanleikanúmeri eru beðnir að skila inn vörunni þar sem hún var keypt eða til Reykjagarðs Fosshálsi 1. 110 Reykjavík.“

Í tilkynningunni segir að í reglubundnu eftirliti með salmonellu í kjúklingaslátrun hafi rökstuddur grunur komið upp um að salmonella hafi greinst í einum kjúklingahópi Reykjagarðs. „Umræddur kjúklingahópur var rannsakaður áður en honum var slátrað án þess að Salmonella hafi fundist. Sýnin eru enn í greiningu hjá Tilraunastöð Háskóla Íslands í meinafræði að Keldum og verða send til staðfestingar á sýkladeild Landspítalans. Endanleg staðfesting mun væntanlega  liggja fyrir í næstu viku.“

Þá segir að tekið skuli fram að ef áprentaðar leiðbeiningar um eldun á umbúðum er fylgt, sé ekki talin hætta á að fólki geti smitast af salmonellu ef kjarnhiti nái 72°C. Ekki liggi fyrir grunur um að aðrar afurðir hjá Reykjagarði séu mengaðar af salmonellu.