Slökktu á útsendingu RÚV því fáir nota sendinn: „Vil fá peninginn minn til baka“

Hjónin Eiður Ólason og Guðrún Sigurjónsdóttir á Glitstöðum í Norðurárdal ná ekki útsendingum Sjónvarpsins eftir að Vodafone ákvað að slökkva á stafrænum sendi í nágrenninu.

Útskýringarnar sem hjónin fá frá Vodafone fyrir þessari ákvörðun er sú að of fáir nýti þennan sendi. Eiður segir í samtali við Vísi að Vodafone hefði boðið honum upp á tvo aðra senda en þau á Glitstöðum ná ekki sambandi við þá.

„Ég næ smá sjónvarpi hérna en það er ekki gott og ekki eins og það á að vera,“ segir Eiður. Það er einn sendir í nágrenni við þau en fjall á milli Glitstaða og sendisins kemur í veg fyrir að beint samband næst við hann. Því þarf Eiður að beina sjónvarpsgreiðunni að fjalli sem er á móti bænum og nær hann þannig speglun af fjallinu. Gæði útsendingarinnar eru þó ekki upp á marga fiska og dettur hún ítrekað út.

„Ég vil fá peninginn minn til baka,“ segir Eiður þegar hann er spurður hvort hann sé ósáttur við þessa ákvörðun Vodafone en hann borgar eins og aðrir landsmenn nefskatt fyrir notkun á Ríkisútvarpinu en getur ekki nýtt sér þjónustu ríkisfjölmiðilsins nema að litlu leyti.

„Ég hlusta svolítið á útvarp en það eru ekki góð útvarpsskilyrði hérna. Ég verð bara glaður með það ef þeir ætla að slökkva á mér og mér er alveg sama þó þeir taki þetta sjónvarp. Það verða kannski ekki allir jafn glaðir með það og ég,“ segir Eiður.

Vodafone sendir þjónustuaðila á Glitstaði

Gunnhildur Ásta Guðmundsdóttir, almannatengill hjá Vodafone, segir fjölda nýrra sjónvarpssenda hafa verið setta upp eða styrkta um land allt undanfarið eitt og hálft ár og hefur að hennar sögn verið lagt kapp á að efla kerfið sem víðast til að hámarka gæði útsendinga fyrir notendur.

Sendirinn sem um ræðir er við Rjúpnaás í Borgarfirði og segir Gunnhildur Ásta að Vodafone hafi metið það svo að óhætt væri að slökkva á honum þar sem aðrir sendar þjónusta þegar umrætt svæði og hafa gert um tíma.

Hún bendir á að fólk sem lendir í vandræðum getur hringt í þjónustuver Vodafone þar sem það fær aðstoð við að ná merki aftur inn hafi það dottið út. Í flestum tilfellum dugir að láta sjónvörpin leita að merkinu upp á nýtt en í einstaka tilfellum þurfa notendur að snúa loftnetum sínum.

„Því er við að bæta að við höfum þegar haft milligöngu um að þjónustuaðili fari á Glitstaði,“ segir Gunnhildur.