Ráðherra segir að virða beri sjálfstæði og fullveldi landamæra Úkraínu

Gunnar Bragi Sveinsson utanríkisráðherra áréttar að virða beri sjálfstæði og fullveldi landamæra Úkraínu. Þetta gerir hann í tilefni þess að ár er liðið frá „ólöglegri innlimun Rússlands á Krímskaga“.

Í tilkynningu frá utanríkisráðuneytinu ítrekar ráðherra fordæmingu á hernaðaraðgerðum Rússlands á Krímskaga í febrúar og mars 2014 og á ólögmætri atkvæðagreiðslu sem fram fór á Krímskaga hinn 16. mars 2014.

„Gunnar Bragi segir að þar sem alþjóðalög hafi verið brotin með framferði rússneskra stjórnvalda í Úkraínu og með innlimun Krímskaga sé öryggismálum í Evrópu teflt í tvísýnu og grafið undan lögum og reglu í alþjóðasamstarfi.

Það sé mikið áhyggjuefni fyrir Ísland enda sé virðing fyrir alþjóðalögum lykilstoð utanríkisstefnunnar og grundvöllur samskipta Íslands við önnur ríki. Hann segir brýnt að málsaðilar virði Minsk vopnahléssamkomulagið og að öll ákvæði þess komi að fullu til framkvæmda.“