Burðardýr í árs fangelsi

Héraðsdómur Reykjaness hefur dæmt brasilíska konu í árs fangelsi fyrir innflutning á hálfu kílói af kókaíni sem talið er að hafi átt að fara í söludreifingu hér á landi.

Konan var burðardýr og faldi efnin á líkama sínum og í farangri en hún kom hingað til lands frá heimalandi sínu, með viðkomu í Frakklandi þann 9. nóvember síðastliðinn. Degi síðar var hún úrskurðuð í gæsluvarðhald sem hún sætti þar til dómur féll fyrir viku. Gæsluvarðhaldið dregst frá fangelsisdómnum.

Sannað þykir að konan hafi flutt inn efnin fyrir tilstilli annarra manna. Hún hafi hvorki komið að skipulagningu né fjármögnun á innflutningnum. Þá er það talið konunni til málsbóta að hún hafi játað brot sitt skýlaust og sýnt ákveðinn samstarfsvilja við rannsókn málsins.

Dóminn má sjá hér.