Próf Bláa naglans getur skapað falskt öryggi

Landlæknisembættið segir að próf Bláa naglans uppfylli ekki ýtrustu kröfur um skimun og það próf sem notað er sé ekki fullreynt og geti því skapað falskt öryggi fyrir þátttakendur.

Í frétt embættisins segir að Blái naglinn hafi í ársbyrjun hafið að senda öllum landsmönnum sem eiga fimmtugsafmæli á árinu próf til að leita að blóði í hægðum. Átak ætti að vera til þriggja ára.

Í fréttinni segir að embætti landlæknis fagni umræðu um leit að krabbameini í ristli. Embættið hafi stýrt vinnu ráðgjafahóps heilbrigðisráðherra um bólusetningar og skimanir vegna smitsjúkdóma og krabbameina.

„Ráðgjafahópurinn skilaði skýrslu til ráðherra haustið 2008 sem var endurskoðuð í ársbyrjun 2009. Ein af ráðleggingum ráðgjafahópsins var að hefja skimun fyrir ristil- og endaþarmskrabbameini en á þeim tíma var ekki unnt að setja verkefnið í forgang. Málið er nú til skoðunar hjá velferðarráðuneytinu.

Embættið vill taka það skýrt fram að frumkvæði Bláa naglans uppfyllir ekki ýtrustu kröfur um skimun og það próf sem notað er er ekki fullreynt og getur því skapað falskt öryggi fyrir þátttakendur.

Mikilvægt er að ákvörðun um skimun fyrir ristilkrabbameini sé tekin af heilbrigðisyfirvöldum í samstarfi við þá sérfræðinga sem best þekkja til þessa sjúkdóms,“ segir í frétt embættisins.