Innlent

Sigmundur Davíð sem Adolf Hitler í væntanlegri leiksýningu

Jakob Bjarnar skrifar
Ef að líkum lætur mun væntanleg uppsetning á Illsku ekki vera Framsóknarmönnum að skapi. Vigdís segir umræðuna löngu komin út fyrir öll siðsamleg mörk.
Ef að líkum lætur mun væntanleg uppsetning á Illsku ekki vera Framsóknarmönnum að skapi. Vigdís segir umræðuna löngu komin út fyrir öll siðsamleg mörk.

Leikhópurinn Óskabörn Ógæfunnar munu á árinu setja upp leiksýninguna Illska sem byggð er á samnefndri verðlaunaskáldsögu Eiríks Arnar Norðdahl. Á Facebooksíðu hópsins segir að auglýst verði síðar hvar, hvenær og hvernig en ljóst sé að þetta sé nokkuð sem er að fara að gerast. „Það eina sem við getum sagt er að þetta verður rosalegt.“

Leikhópurinn hefur þegar látið til sín taka í íslensku leikhúslífi og setti upp Bláskjá, sýningu sem byggir á leikriti Tyrfings Tyrfingssonar, sem sló í gegn og er rómuð.

Líkast til er það ekki orðum aukið, að sýningin verður rosaleg en Illska Eiríks Arnar fjallar um uppgang nasisma en á síðu hópsins getur að líta mynd sem gera má ráð fyrir að sé plakat til að fylgja sýningunni úr hlaði. Vísi tókst ekki að ná tali af leikstjóranum Vigni Rafni Valþórssyni til að fá hann til að útskýra nánar hvernig það megi vera að myndin á plakatinu er af Sigmundi Davíð Gunnlaugssyni með Hitler-skegg? Ekki er óvarlegt að ætla að uppfærslan verði með skírskotun til íslensks raunveruleika, en í því sambandi má nefna að talsverð umræða hefur geisað um meint líkindi Framsóknarflokksins og popúlískra flokka í Evrópu, hvað svo sem segja má um hversu trúverðugar þær kenningar mega heita.

Vísir bar þetta og myndina undir Vigdísi Hauksdóttur, þingmann Framsóknarflokksins, en hún sagði: „No komment, þetta dæmir sig sjálft,“ og er þá að tala um plakat leikhópsins.

Þegar hún var innt eftir því hvort þarna væri hugsanlega verið að fara yfir einhver mörk, þá með að stilla Sigmundi Davíð upp sem Adolf Hitler, segir Vigdís:

„Hvar sem ég kem er fólki algerlega farið að blöskra umræðan sem hefur skapast í kringum Framsóknarflokkinn síðastliðin ár. Að mínu mati er umræðan löngu komin út fyrir öll siðsamleg mörk sem speglast í því að ákveðinn hópur í samfélaginu viðurkennir ekki úrslit síðustu alþingiskosninga og beitir öllum tiltækum ráðum til að sverta flokkinn.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.