Strætóbílstjóri hætti akstri því aldraður farþegi fékk ekki sæti

„Strætóbílstjórinn gerði það sem hún átti að gera og mér fannst það mjög flott hjá henni,“ segir Daníel Ingi Sigþórsson um strætóbílstjóra sem neitaði að halda för strætisvagns áfram nema ungir farþegar hans stæðu upp fyrir öldruðum farþega sem fékk hvergi sæti.

Hann segir þennan vagn hafa verið á leið 28, frá Mjóddinni í Breiðholti til Hamraborgar í Kópavogi, þegar hann gekk sjálfur inn í vagninn á fjórða tímanum í gær en hann lýsir þessu atviki á Facebook. Þar segir hann strætisvaginn hafa verið þéttsetinn af grunnskólanemendum á unglingastigi og hvergi sæti að fá. Við næstu stoppistöð gekk gamall maður inn í strætisvagninn og ekkert sætispláss fyrir hann.

Báðu unga fólkið að standa upp

„Og allir horfa bara á manninn vandræðast um. Þá er strætóbílstýrunni nóg boðið og biður einhvern um að standa upp. Þar sem hún er útlensk horfir hún á fremstu raðirnar á meðan ég spyr yfir hópinn: „Vill ekki einhver leyfa honum að setjast?“, skrifar Daníel á Facebook.

Hann segir strætóbílstjórann hafa sagt eftir stutta bið að strætisvagninn færi ekki aftur af stað fyrr en gamli maðurinn væri kominn með sæti. „Krakkarnir gera varla neitt í því nema loksins er fært sig svo pláss sé fyrir einn rass, en ekki í fremstu röðunum heldur á hliðinni í óþægilegu sætunum sem eru nú þröngt setin af foreldri með barn og fiðlu,“ skrifar Daníel.

Foreldrar kenni börnunum mannasiði

Hann segir stætóbílstjórann hafa því næst sest aftur í bílstjórasætið og ekið vagninum af stað en þá hefðu krakkarnir rætt sín á milli hvað bílstjórinn væri ömurlegur. Hann biður foreldra um að brýna fyrir börnunum almenna mannasiði og að virða náungann. „Og mér finnst strætóbílstjórar hafa þurft að þola margt í gegnum árin þar sem börn og unglingar segja hvað sem þau vilja við þau,“ skrifar Daníel.

„Krakkar sýna svo mikla óvirðingu í dag,“ segir Daníel, sem er ritstjóri sjomlatips.is, í samtali við Vísi um málið. „Ég stóð upp fyrir gömlu fólki í strætó þegar ég var yngri en ég átti vini sem gerðu það ekki. En það er alltaf svona fólk allstaðar á öllum tímum.“

Post by Daníel Ingi Fimmvörðuháls.