Ekki útilokað að banvænar súperman-töflur séu í umferð á Íslandi

Yfirmaður fíkniefnadeildar lögreglunnar á höfuðborgarsvæðinu segir ekki útilokað að banvænt efni í e-töflum, sem hefur dregið að minnsta kosti sex ungmenni í Evrópu til dauða á síðustu vikum,  sé í umferð á Íslandi. 

Lyfjastofnun varaði í vikunni við PMMA,  lífshættulegu efni í e-töflum sem hefur verið að ryðja sér rúms meðal vímuefnaneytanda í Evrópu. PMMA er náskylt MDMA, betur þekkt sem e-pilla, alsæla eða mollý, sem hefur notið nokkurra vinsælda meðal íslenskra ungmenna undanfarið,  en er mun hættulegra. 

Lögreglan á höfuðborgarsvæðinu greindi fyrir helgi frá því að Europol hefði gefið út viðvörun vegna aukinnar dreifingar á vímuefninu síðustu vikur. Eng­in leið er fyr­ir þá sem nota slík­ar pill­ur að vita hvort um ræði MDMA pillu eða pillu með PMMA. 

„Lyfjastofnanir á Norðurlöndunum hafa gefið út viðbörun um þetta efni. Það hafa verið rakin allavega sex dauðsföll til þess á síðustu vikum, í Englandi, Skotlandi og Svíþjóð,“ segir Aldís Hilmarsdóttir, yfirmaður fíkniefnadeildar LRH.

Eit­ur­lyfið er yfirleitt í formi taflna, sem oft stimplaðar með súperman-merkinu. Það er þó ekki einhlýtt. Vitað er til þess að töflur með súperman-merkinu séu í umferð á Íslandi, en Aldís segir lögreglan hafi síðast lagt hald slíkar töflur í ágúst í fyrra.

„Það voru örfáar töflur haldlagðar árið 2014 með þessu súpermanútliti. Við höfum ekki ástæðu til að halda að þær hafi innihaldið PMMA, en vitum að þær innihéldu nokkuð mikið magn MDMA. Við ætlum samt sem áður að ganga úr skugga um það. Þessi dauðsföll voru í kringum hátíðarnar,  og það hafa ekki komið nein slík tilfelli á Íslandi, en við getum ekki útilokað að þetta sé komið til landsins, “ segir Aldís.

Hætta PMMA taflna felst meðal annars í því að vímuáhrifin koma seint og þess vegna eru líkur á því að neytandinn haldi að taflan hafi verið veik og leiðist þá til að taka aðra töflu til viðbótar.  Þannig aukast líkur á ofskömmtun, en ungmenni eru þar í sérstökum áhættuhópi.