Önnur gögn en símtalið ekki til

Ingibjörg Kristjánsdóttir, eiginkona Ólafs Ólafssonar, birti athugasemdir sínar við dóm Hæstaréttar í Al Thani-málinu í aðsendri grein í Fréttablaðinu í gær, þar sem hún hélt því fram að Hæstarétti hefðu orðið á mistök þegar hann taldi vísað til Ólafs Ólafssonar í símtali þar sem talað var um „Óla“.

Eftir að Björn Þorvaldsson saksóknari hafði tjáð sig um málið í fjölmiðlum þar sem hann fullyrti að enginn misskilningur hefði átt sér stað sem og að það skipti engu máli, ákvað Ingibjörg að birta frekari svör til Björns. Í því talar hún um kokhreysti saksóknarans sem hún segir ekkert nýmæli.

„Hvað sem orðum hans líður er alveg dagljóst af lestri dómsins, að símtal tveggja manna þar sem „Óli“ kemur við sögu er lykilatriði fyrir sakfellingu eiginmanns míns í málinu. Það sem ég vildi vekja athygli á og fjölmörgum öðrum er kunnugt um er sú staðreynd að umræddur „Óli“ er bara allt annar maður en Ólafur Ólafsson,“ skrifar Ingibjörg.

Ingibjörg birti í kjölfarið orðrétta kafla úr niðurstöðu Hæstaréttar. Hún telur sýnt að önnur gögn hafi ekki verið til staðar um sönnun fyrir þeim ályktunum sem Hæstiréttur notar í niðurstöðum sínum – að sakfella eiginmann hennar Ólaf Ólafsson.