Hættir þegar hann vantar bara einn leik í metið

Morten Olsen stýrði danska landsliðinu í síðasta sinn í gær þegar Danir gerðu 2-2 jafntefli við Svía í seinni umspilsleik þjóðanna um sæti á Evrópumótinu í Frakklandi næsta sumar.

Morten Olsen, sem er orðinn 66 ára gamall, var búinn að gefa það út að hann ætlaði að hætta eftir þessa keppni.

Hann og Danir ætluðu sér að hafa kveðjustundina á EM í Frakklandi en danska liðið er úr leik og fimmtán ára þjálfaratíð Olsen er því á enda.

Morten Olsen staðfesti það eftir leikinn í gær að hann og danska sambandið hafi komið sér saman um það að hann hætti strax.

Olsen tók við danska landsliðinu 1. júlí 2000 og leikurinn í gær var leikur númer 166. Hann sjálfur spilaði 102 leiki fyrir Dani á árunum 1970 til 1989. Olsen kom Dönum á fjögur stórmót, HM 2002, EM 2004, HM 2010 og EM 2012. Hann endaði hinsvegar á því að missa af tveimur stórmótum í röð.

„Það er sárt að enda þetta svona eftir 35 ára sem leikmaður eða þjálfari en ég finn samt mest til með Dönum sjálfum, með stuðningsmönnunum," sagði Morten Olsen eftir leikinn.  

Sjá einnig:Ég sendi dönsku þjóðina á eftirlaun

Spænski tölfræðingurinn Alexis Martín-Tamayo benti á það að Morten Olsen vantar bara einn leik til að ná meti Þjóðverjans Sepp Herberger sem er sá hefur stýrt einu landsliði í flestum leikjum.

Sepp Herberger var með þýska landsliðið frá 1936 til 1942 og svo aftur með vestur-þýska landsliðið frá 1950 til 1964. Hann gerði Vestur-Þjóðverja að heimsmeisturum í fyrsta sinn árið 1964.

Herberger stýrði þýska landsliðinu samtals í 167 leikjum og liðið vann 94 af þeim eða 56 prósent leikjanna. Danir unnu 80 af 166 leikjum sínum undir stjórn Olsen eða 48 prósent leikjanna.