Stones nú orðaður við Barcelona

John Stones er eftirsóttur af mörgum af stærstu liðum Evrópu ef marka má fréttir ensku blaðanna í dag. Stones er nú orðaður við spænska stórveldið Barcelona.

Félagið mun hafa verið með útsendara á leik Englands og Frakklands í vikunni til að fylgjast með Stones en ekki framherjanum Jamie Vardy, sem hafði áður verið orðaður við Barcelona í slúðurpressunni á Spáni og Englandi.

Sjá einnig: Rio segir að Stones eigi miklu frekar að fara til United en Chelsea

Þá vakti það athygli að Gerard Pique, varnarmaður Barcelona, stillti Stones upp í þriggja manna varnarlínu í heimsúrvali sem hann valid fyrir viðtal sem birtist í Telegraph í síðustu viku. Pique setti sjálfan sig í vörn liðsins, ásamt Sergio Ramos hjá Real Madrid og Stones.

Fulltrú nýrrar kynslóðar

„Hann er virkilega, virkilega góður leikmaður. Hann mun eiga góðan feril,“ sagði Pique í umræddu viðtali. „Hann er fulltrúi nýrrar kynslóðar sem hefur betri skilning á fótbolta en bara frá sjónarhóli varnarmanns.“

Chelsea reyndi af fremsta megni að kaupa Stones í sumar en Everton neitaði að selja. Þá hefur hann einnig verið orðaður við Manchester United en samkvæmt enskum fjölmiðlum vill Everton fá minnst 40 milljónir punda fyrir kappann.

Sjá einnig: John Stone óskar eftir því að verða seldur

Stones lagði sjálfur inn félagaskiptabeiðni í lok sumars en það breytti engu um afstöðu Everton. Stones hefur spilað vel í haust og segist vera ánægður í herbúðum Everton.