Banaslys rakið til hraðaksturs og framúraksturs

Banaslys sem varð á Faxabraut á Akranesi þann 16. maí 2013 er rakið til ógætilegs framúraksturs og hraðaksturs. Þetta kemur fram í skýrslu um slysið sem Rannsóknarnefnd samgönguslysa birti í dag.

Slysið varð með þeim hætti að ökumaður bifhjóls ók austur eftir Faxabraut og tók fram úr fólksbíl áður en hann kom að hraðatakmarkandi koddum í götunni og á miðeyju.

Að sögn vitna virtist sem ökumaðurinn fipast við akstur bifhjólsins þegar hann fór yfir hraðahindrunina. Hann náði þó að halda stjórn á hjólinu þar til hann kom að vinstribeygju sem er 50 metrum frá hraðahindruninni.

Þá hemlaði ökumaðurinn og afturhjól bifhjólsins læstist. Við það lenti framhjólið á gangstéttarbrún, ökumaðurinn kastaðist af hjólinu, fór yfir grjótvarnargarð og niður í fjöru 6 metrum fyrir neðan veginn. Hann lést af áverkum sínum á sjúkrahúsi að kvöldi slysdags.