Aukin andstaða við háspennulínu yfir Sprengisand

Andstaða almennings við lagningu háspennulínu yfir Sprengisand hefur aukist umtalsvert. Þetta er niðurstaða nýrrar skoðanakönnunar sem Gallup gerði fyrir Landvernd og Náttúruverndarsamtök Íslands.

Hlutfall þeirra sem eru andvígir er nú 43,4 prósent en í sambærilegri könnun sem gerð var í ágúst 2012 voru 36 prósent aðspurðra andvíg lagningu háspennulínu yfir Sprengisand. Hlutfall þeirra sem eru andvígir háspennulínu hafi því aukist um 7,5 prósentustig.

Í tilkynningu frá Landvernd segir að sömuleiðis hafi stuðningur við Sprengisandslínu minnkað frá því í ágúst 2012. Þá voru 28 prósent aðspurðra fylgjandi lagningu háspennulínu yfir Sprengisand en nú eru 25,4 prósent fylgjandi.

Spurt var: Ertu hlynnt(ur) eða andvíg(ur) því að lögð verði háspennulína yfir hálendið um Sprengisand?

Í tilkynningunni segir að í síðustu viku hafi samtökin kynnt könnun sem sýndi að stuðningur almennings við stofnun þjóðgarðs á miðhálendi Íslands hafi aukist umtalsvert miðað við sambærilega könnun árið 2011. „Af því má ráða að stuðningur við verndun hálendisins njóti vaxandi stuðnings í þjóðfélaginu. Stefna ríkisstjórnarinnar gengur þvert á þann almenna vilja.

Framkvæmd þessarar skoðanakönnunar er hluti af hálendisverkefni Landverndar og Náttúruverndarsamtaka Íslands. Verkefnið nýtur stuðnings Náttúruverndarsjóðs Pálma Jónssonar og fjár sem safnaðist á tónleikunum 'Gætum garðsins' sem haldnir voru samtökunum tveimur til stuðnings í mars 2014.“