Samningur um sóknaráætlun Austurlands

Atvinnu- og nýsköpunarráðuneyti, mennta- og menningamálaráðuneyti og Samband sveitarfélaga á Austurlandi undirrituðu í dag samning um sóknaráætlun Austurlands 2015-2019. Alls renna um 95 milljónir króna til Austurlands.  Þetta kemur fram í tilkynningu frá Sambandi sveitarfélaga á Austurlandi.

Með samningnum er verið að sameina sóknaráætlanir landshluta, vaxtarsamninga og menningarsamninga. Heildarupphæð samninganna á landinu öllu er ríflega 550 milljónir króna.

Sem fyrr segir er verið að sameina fjóra potta úr tveimur ráðuneytum; menningarsamningar, framlög til menningartengdrar ferðaþjónustu, vaxtarsamnignar og gömlu sóknaráætlanirnar. Til viðbótar koma framlög sveitarfélaganna í hverjum landshluta sem mótframlag til menningarmála.

Landshlutasamtökunum er falið að ráðstafa fjármagni til allra þessara liða í samræmi við eigin sóknaráætlanir, að því er fram kemur í tilkynningunni. Með samningnum verður til nýr Uppbyggingarsjóður.

„Það geta verið ýmis konar áhersluverkefni innan landshlutanna eins og t.d. gerð svæðisskipulags eða efling Egilsstaðaflugvallar. Við þurfum meira fjármagn í slík verkefni og að það verður að tryggja til lengri tíma,“ segir Sigrún Blöndal formaður SSA. Þá segir hún að verkefni SSA á næstu árum verði að sækja enn meira fé til ríkisins sem ekki eru nú þegar eyrnamerkt fyrirfram skilgreindum verkefnum á sviði atvinnu, nýsköpunar og menningar.