Búast má við umferðartöfum víða vegna gatnaframkvæmda

Búast má við umferðartöfum á Reykjanesbraut í dag þar sem unnið verður við fræsun og malbikun á Reykjanesbraut, milli Fífuhvammsvegar og fram yfir brú við Stekkjarbakka. Þrenging verður á Reykjanesbraut vegna þessa auk þess sem rampur upp á Breiðholtsbraut verður lokaður meðan á framkvæmdum stendur til klukkan 18 í dag.

Þá verður unnið fram eftir degi við fræsingu og malbikun á Suðurlandsvegi frá Breiðholtsbraut að Hádegismóum og einni á Vesturlandsvega á milli Víkurvegar og Úlfarfellsvegar. Einungis verður lokað á þeirri akrein sem unnið er á.

Einnig verður unnið við malbikun á þjóðvegi 1 við Hellu og verður hringtorgið lokað að hluta meðan á framkvæmd stendur.

Vegna framkvæmda við undirgöng undir Vesturlandsveg á móts við Aðaltún í Mosfellsbæ, er umferð þar nú beint um hjáleið. Hraði er tekinn niður í 50 km/klst. Áætlað er að nota þurfi hjáleiðina fram yfir miðjan september og að framkvæmdum ljúki í nóvember.                   

                                                

Verið er að ganga frá tengingu núverandi Álftanesvegar við þann hluta sem endurbyggður var 2014 við Garðaholt. Loka þarf veginum á meðan og verður hjáleið um Garðaholtsveg og Garðaveg. Vinnan hefur ekki áhrif á umferð gangandi og hjólandi vegfarenda um göngustíginn.  Verkinu á að ljúka 22. júlí.

Vegfarendur eru beðnir velvirðingar á óþægindum sem þetta veldur og eru hvattir til að fylgja þeim merkingum og leiðbeiningum sem uppi eru hverju sinni, að því er fram kemur í tilkynningu frá Vegagerðinni.