Enginn Giggs, enginn Gerrard, engir heimamenn

Biðin í landsleikjafríinu eftir næstu umferð í ensku úrvalsdeildinni var ekki jafn löng og áður. Strákarnir okkar hafa séð til þess að landsleikjahlé er eitthvað sem íslenskir fótboltaáhugamenn hlakka nú til. En menn hlakka líka alltaf til næstu umferðar í ensku úrvalsdeildinni og sérstaklega þegar viðureign Man­chester United og Liverpool er á dagskrá.

Leikurinn í dag er sögulegur eins og þeir eru oft. Í fyrsta sinn síðan enska úrvalsdeildin var stofnuð árið 1992 verður enginn heimamaður í liðunum. Manchester United og Liverpool hafa mæst 46 sinnum í ensku úrvalsdeildinni og alltaf hafa stuðningsmenn liðanna geta fylgst með að minnsta kosti einum af „sínum mönnum.“

Og ekki nóg með það. Í fyrsta sinn í 16 ár mætast þessir erkifjendur án þess að máttarstólpar liðanna og leikjahæstu menn frá upphafi, Ryan Giggs og Steven Gerrard, verði með. Giggs lagði skóna á hilluna fyrir síðustu leiktíð og Steven Gerrard var kvaddur með stæl (af stuðningsmönnum Liverpool) á Anfield í fyrra.

Tímarnir eru heldur betur breyttir enda streyma nú inn bestu leikmenn heims í gámavís í vinsælustu fótboltadeild í heimi. Þegar Steven Gerrard spilaði sinn fyrsta leik fyrir Liverpool á móti Man. Utd í september árið 1999 voru átta uppaldir leikmenn í liðunum tveimur. Gerrard, Jamie Carragher (sem skoraði tvö sjálfsmörk í 3-2 sigri United í leiknum), Robbie Fowler og David Thompson voru allir í liði Liverpool en hjá Rauðu Djöflunum voru þeir Phil Neville, Nicky Butt, Ronnie Wallwork og Paul Scholes í liðinu.

En þetta var þá. Aðkeyptir enskir og erlendir leikmenn eru fljótir að átta sig á rígnum á milli þessara liða. Og þeir þurfa líka að fara að spila betur. Bæði lið unnu fyrstu leiki sína og það allt annað en sannfærandi. Bæði gerðu svo jafntefli í þriðju umferðinni áður en United tapaði gegn Swansea eftir að komast 1-0 yfir og Liverpool fékk skell gegn West Ham.

Eins mikið og stuðningsmönnum beggja liða finnst gaman að gera grín að hvorir að öðrum verða bæði sett að átta sig á því að liðin þeirra eru ekki að spila nógu vel. Samtals eru þau aðeins búin að skora fimm mörk (Utd 3, Liv 2). Liverpool fékk reyndar sæg af færum í þriðju umferðinni gegn Arsenal en það eru mörkin sem fólk man eftir.

Liverpool verður án mannsins sem hefur haldið sóknarleiknum uppi, Brasilíumannsins Phillipe Coutinho. Brassinn snaggaralegi fékk tvö klaufaleg gul spjöld gegn West Ham og geta United-menn andað léttar að þurfa ekki að kljást við hann. Christian Bent­eke hefur farið rólega af stað og skorað eitt kolólöglegt mark. Sigurmark á Old Trafford væri þó fljótt að koma honum á háan stall á Anfield.

Stóra sagan úr herbúðum Man­chester United er markvarðamálin. Svo virðist sem (fáir) dagar Sergio Romero sé taldir í byrjunarliðinu. David De Gea, sem átti að vera farinn til Real Madrid, skrifaði undir nýjan fjögurra ára samning í gær. Hann hefur lítið spilað að undanförnu en varði þó mark Spánar í landsleikjavikunni. Vandamál United hefur ekki verið varnarleikurinn eða markvarslan – nema á móti Swansea – en það er ekkert verra að fá einn besta markvörð heims aftur í rammann.