Hópnauðgunarkæra enn á borði ríkissaksóknara

Ríkissaksóknari er enn með mál fimm pilta sem kærðir voru fyrir hópnauðgun síðastliðið vor til skoðunar. Ekki liggur því fyrir hvort ákært verði í málinu eða það látið falla niður. Þetta kemur fram i svörum frá embætti ríkissaksóknara við fyrirspurn Vísis.

Mennirnir voru handteknir í kjölfar þess að sextán ára stúlka lagði fram kæru á hendur þeim fyrir nauðgun í samkvæmi í Breiðholti. Þeir voru leiddir fyrir dómara og úrskurðaðir í gæsluvarðhald. Þeir hafa allir lýst yfir sakleysi sínu og sagt stúlkuna hafa veitt samþykki fyrir því að stunda með þeim samfarir.

Meðal gagna sem stúlkan lagði fram er myndband af atvikinu. Vitað er að myndbandið fór í dreifingu á netinu auk þess sem að allir aðilar málsins voru nafngreindir á samfélagsmiðlum.