Sport

Rodgers hefur veðjað á marga ranga hesta

Henry Birgir Gunnarsson skrifar
Brendan Rodgers þarf að gera betur á félagaskiptamarkaðnum.
Brendan Rodgers þarf að gera betur á félagaskiptamarkaðnum. vísir/getty

Þrátt fyrir að hafa keypt leikmenn fyrir 41,5 milljarða króna síðan hann kom til Liverpool virðist Brendan Rodgers ekki vera á réttri leið með liðið.

Það er úr leik í Meistaradeild Evrópu þrátt fyrir að hafa lent í afar auðveldum riðli. Eini sigurinn í riðlinum kom á heimavelli gegn Ludogorets sem telst seint vera í hópi sterkustu liða Evrópu. Sigurmark Liverpool í leiknum kom úr vítaspyrnu í uppbótartíma. Ekki beint sannfærandi.

Liverpool fékk tækifæri til þess að komast áfram. Það sem til þurfti var heimasigur gegn svissneska liðinu Basel sem hefur ekki verið eins veikt í áraraðir.

Var rifjað upp í aðdraganda leiksins hvernig Steven Gerrard bjargaði Liverpool tíu árum áður í sömu stöðu í leik gegn Olympiakos.

Kaupin hjá Rodgers - góð og slæm. grafík/Magnús

Í ljós kom að lítið hefur breyst á þessum tíu árum. Liðið er enn allt of háð Gerrard sem er ekki sami leikmaðurinn og hann var fyrir tíu árum. Engu að síður var hann nálægt því að bjarga sínum mönnum í leiknum.

Liverpool varð í öðru sæti ensku deildarinnar á síðustu leiktíð og í raun aðeins einni „dettu“ frá meistaratitlinum að margra mati. Þá héldu margir að fram undan væru bettri tíð með blóm í haga. Liðið komið aftur í Meistaradeildina með ungan, spennandi stjóra og fullt af frambærilegum leikmönnum.

Suarez var of mikilvægur
Liverpool seldi sinn besta mann frá síðasta tímabili, Luis Suarez, fyrir 75 milljónir punda og keypti í staðinn eina átta leikmenn. Liverpool eyddi þrátt fyrir það aðeins 33 milljónum punda meira í leikmenn en þeir seldu í sumar.

Að missa Suarez var meira en liðið réð við. Hann halaði oft inn stig upp á eigin spýtur en það hefur enginn tekið við keflinu.

Allir þeir leikmenn sem síðan voru keyptir til félagsins í sumar hafa valdið gríðarlegum vonbrigðum. Gerrard hefur síðan gefið mikið eftir og þá virðist ákaflega lítið vera eftir.

Úr hetju í skúrk
Liðið er á leið í Evrópudeildina eftir sneypuförina í deild þeirra bestu og situr aðeins í níunda sæti ensku úrvalsdeildarinnar og er heilum fimmtán stigum á eftir toppliði Chelsea eftir aðeins fimmtán umferðir.

Aðeins nokkrum mánuðum eftir að Brendan Rodgers var hampað sem kraftaverkamanni eru menn farnir að efast um stjórnunarhæfileika hans.

Hann þykir ekki hafa staðið sig vel á leikmannamarkaðnum og hefur einnig verið gagnrýndur fyrir stjórnun á hliðarlínunni í vetur. Nú síðast í leiknum gegn Basel.

Vegurinn er ekki langur frá því að vera hetja og í að vera skúrkur. Það er Rodgers að upplifa og hann hefur sjálfur viðurkennt að starf hans gæti verið í hættu.

Það verður verk stjórnarmanna félagsins á næstu misserum að vega og meta hvort sé betra fyrir félagið. Að halda tryggð við Rodgers, og hans uppbyggingu, eða sparka honum og byrja upp á nýtt með nýjum manni.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.