Sautján ára stúlka heldur ráðstefnu um menntamál

„Vandamálið er að nemendur eru ekki nógu upplýstir um styttinguna og vita í raun ekkert hvað koma skal,“ segir Unnur Lárusdóttir, sautján ára nemi í Verzlunarskóla Íslands sem stendur fyrir ráðstefnu í Hörpu á miðvikudag sem ber yfirskriftina: Stytting framhaldsskólanna. Frábær eða fáránleg? 

Forsaga framtaksins er sú að Unnur fór til Bandaríkjanna í sumar á ráðstefnu þar sem krakkar frá bæði Evrópu og Ameríku hittust til að ræða hin ýmsu samfélagsmálefni og lærðu aðferðir við að leysa vandamál í þjóðfélaginu sínu.

„Ég fór að velta því fyrir mér hvaða vandamál mér fannst mest áberandi meðal krakka á mínum aldri á Íslandi.“ Unnur segist strax hafa hugsað um breytingarnar og þróunina á menntakerfinu. „Mér datt í hug að reyna að nálgast opna umræðu og vera með ráðstefnu þar sem ég myndi fá fólk til að ræða málefnið, bæði kosti og galla. Þannig getur fólk tekið afstöðu vitandi meira um málið, ekki bara vera á einhverri skoðun án þess að geta fært rök fyrir máli sínu.“

Umræðan í þjóðfélaginu varðandi styttingu framhaldsskólanna er ákaflega skipt að mati Unnar. „Mér finnst fólk annaðhvort alfarið á móti þessu eða alfarið með styttingunni. Fólk er svo mikið að mynda sína afstöðu út frá mismunandi mýtum í samfélaginu. Það er bein orsök af því að fólk er ekki nógu upplýst.“

Unnur stendur ein fyrir skipulagningunni en undirbúningur hefur tekið um einn og hálfan mánuð. Hún segist hafa fengið góð viðbrögð úr öllum áttum og að hennar ungi aldur hafi aldrei verið fyrirstaða heldur miklu heldur drifkraftur fyrir hana.

Ráðstefnan verður milli fimm og sjö og er frítt inn. Unnur segir kostnað fylgja ráðstefnu sem þessari en hún hefur fengið styrki fyrir öllu frá Verzlunarskólanum, Purdue háskóla í Bandaríkjunum, Hrenisitækni ehf. og fleirum. Ræðumenn eru ekki af verri endanum en fram koma menntamálaráðherra, skólastjóri Verzlunarskólans, prófessor við menntavísindasvið Háskóla Íslands, forseta N.F.V.Í og fyrrum formaður Sambands íslenskra framhaldsskóla.

„Styttingin hefur áhrif á svo marga, ekki bara nemendur heldur kennara, foreldra, samfélagið í heild. Ég vona bara að mér takist að fylla salinn og að þetta hafi áhrif.“