Engar nýjar kærur hafa borist vegna lögregluskýrslunnar

„Það er ekki mitt að meta það hvort það hafi verið mistök eða ekki,“ sagði Sigríður Björk Guðjónsdóttir, lögreglustjórinn á höfuðborgarsvæðinu, sem kom í gær fyrir stjórnskipunar- og eftirlitsnefnd Alþingis vegna skýrslu um aðgerðir lögreglunnar við mótmæli árin 2008 til 2011.

Sigríður sagði skýrsluna einsdæmi og að slík samantekt yrði ekki gerð aftur.

Geir Jón Þórisson, þáverandi yfirlögregluþjónn sem gerði skýrsluna, sagði menn geta gagnrýnt textann og ásakað hann um hitt og þetta. „Þarna voru lögreglumenn sem sögðu sínar skoðanir og skýrslan var aldrei ætluð til húslestrar,“ sagði Geir Jón við Vísi í gær.

Einn þeirra sem nefndir eru í skýrslunni hefur kært lögregluna. „Ein kæra hefur borist og ekkert frekar um það að segja á þessu stigi,“ er svar ríkissaksóknara við fyrirspurn Fréttablaðsins.- gar