Hyggst fá verðlaun fyrir fegurstu lóðina

„Að okkar mati eru engin haldbær rök fyrir því að neita þessum framkvæmdum,“ segir Kristján Berg í Fiskikónginum, sem borgin hefur í annað sinn neitað um leyfi fyrir þaki yfir port við verslunina á Sogavegi 3.

Ofangreind tilvitnun er úr greinargerð Kristjáns til borgarinnar. Þar rekur hann að miklar breytingar hafi orðið við Sogaveg 3 frá því húsið var byggt árið 1983; húsið hafi verið stækkað til austurs og vesturs, undir nýbyggingu sé kjallari og stórt port fyrir vörumóttöku sé nú við húsið.

Það er einmitt yfir þetta port sem Kristján vill byggja. Ósk hans þar að lútandi var fyrst synjað af borgaryfirvöldum fyrir þremur mánuðum, meðal annars með vísan til nágranna sem höfðu áhyggjur af auknum umsvifum á staðnum.

„Að sjálfsögðu er mikið rask þegar verið er að byggja hús og þá sérstaklega þegar versluninni hefur ekki verið lokað í eina einustu mínútu á meðan á öllu þessu stóð,“ rekur Kristján í nýju umsókninni og undirstrikar þar eftirfarandi: „Á meðan allt þjóðfélagið var á „hold“ þá var verið að stækka, byggja, breyta og bæta húsnæðið frá a til ö.“

Við þetta bætir Kristján að peningar vaxi ekki á trjánum. Allur kraftur og peningar eigandans hafi farið í að láta húsnæðið standast kröfur. „Skiljum við gremju einhvers ef það hefur verið sjónrænt drasl á lóð Sogavegar 3 út af byggingarframkvæmdum,“ segir Kristján í greinargerðinni og tekur fram að allt sé nú komið í 100 prósent lag.

Þá ítrekar Kristján að ekki standi til að auka umfang verslunarinnar. „Fyrst og fremst er þessi umsókn um bygginguna yfir portið til þess fallin að gera þetta að fallegu húsi sem getur sómt sér vel fyrir borgarbúa og íbúa hverfisins ásamt eiganda fyrirtækisins,“ segir Kristján sem kveður fiskverslunina eiga að vera til fyrirmyndar.

Þá minnir Kristján á að fyrir um þremur áratugum hafi Sogavegur fengið verðlaun fyrir fallegustu fyrirtækjalóðina. Stefnan nú sé að fá slík verðlaun á næstu tveimur til þremur árum.

Embætti skipulagsfulltrúa segist lýsa ánægju með bættan frágang lóðar Fiskikóngsins og umgengni um hana en synjar ósk Kristjáns.

„Ekki er fallist á að framkomin séu rök fyrir breyttri afstöðu til umsóknarinnar enda hafa, eins og fram kemur í greinargerðinni, verið veitt nokkur leyfi fyrir þróun hússins á lóðinni undanfarin ár,“ segir í umsögn skipulagsfulltrúans.