Ragnar að stinga alla af í stoðsendingunum

Ragnar Leósson lagði upp þrjú marka Fjölnisliðsins í sigrinum á Þór í síðustu umferð Pepsi-deildarinnar og náði fyrir vikið yfirburðaforystu á listanum yfir flestar stoðsendingar í deildinni í sumar. Ragnar er þegar búinn að gefa átta og hefur stimplað sig vel inn í sumar eftir svolítið erfið fyrstu skref í Pepsi-deildinni undanfarin ár. Hann er á 23. aldursári en lék sinn fyrsta leik í efstu deild fyrir sjö árum.

Ragnar hafði samt mest spilað sjö leiki á einu tímabili í efstu deild fyrir þetta sumar og átti samtals 17 leiki í úrvalsdeild karla fyrir tímabilið í ár. Ragnar hafði enn fremur ekki gefið stoðsendingu í efstu deild fyrir þetta tímabil.

Ragnar hefur lagt upp flest mörkin með flottum fyrirgjöfum en aðeins ein af þessum stoðsendingum hans hefur verið gefin innan vítateigs og þá var hann staddur rétt inn fyrir vítateigslínuna. Öll mörkin sem hann hefur lagt upp hafa verið skoruð inni í teig og öll nema eitt fyrir innan vítapunktinn. Ragnar tekur líka mikið af föstu leikatriðunum fyrir Fjölnisliðið þar sem Grafarvogspiltar hafa oft skapað mikla hættu í Pepsi-deildinni í sumar en aðeins ein stoðsendinga hans hefur þó komið beint úr föstu leikatriði.

Hér fyrir neðan má sjá nánar hvaðan stoðsendingarnar hans hafa komið og hvaðan mörkin sem hann hefur lagt upp hafa komið.

Ragnar hefur lagt upp flest mörk fyrir bandaríska framherjann Christopher Tsonis eða þrjú en hann hefur átt tvær stoðsendingar á Guðmund Karl Guðmundsson og eina á hvern þeirra Hauks Lárussonar, Gunnars Más Guðmundssonar og Ágústs Arnar Arnarsonar. Ragnar lagði upp fyrsta úrvalsdeildarmarkið fyrir þá Tsonis, Hauk, Guðmund Karl og Ágúst Örn.

Ragnar hefur lagt upp fimm marka sinna í síðustu fjórum leikjum Fjölnis en hann gaf ekki sína fyrstu stoðsendingu í sumar fyrr en í 4. umferð.

Ragnar hefur þriggja stoðsendinga forskot á þá Arnar Már Björgvinsson (Stjörnunni), Hauk Heiðar Hauksson (KR) og Atla Guðnason (FH) en allir fjórir áttu stoðsendingar í 13. umferðinni. Atli hefur enn fremur lagt upp þrjú síðustu mörk FH í Pepsi-deildinni og Arnar Már er búinn að gefa fjórar stoðsendingar í þremur síðustu leikjum Garðabæjarliðsins.

Fjórir leikir í kvöld

Næsti leikur Ragnars og Fjölnismanna er á móti Val á Vodafone-vellinum klukkan 19 í kvöld en þá fara einnig fram þrír aðrir leikir: Fylkir-ÍBV (Klukkan 18.00), Þór-Fram (18.00) og Breiðablik-Keflavík (19.15). Leikjum FH og Stjörnunnar var frestað vegna Evrópuleikja þeirra annað kvöld.

Flestar stoðsendingar í Pepsi 2014:

Ragnar Leósson, Fjölni    8

Arnar Már Björgvinsson, Stjörnunni    5

Atli Guðnason, FH    5

Haukur Heiðar Hauksson, KR    5

Aron Elís Þrándarson, Víkingi    4

Elías Már Ómarsson, Keflavík    4

Kristinn Freyr Sigurðsson, Val    4

Veigar Páll Gunnarsson, Stjörnunni    4

Árni Vilhjálmsson, Breiðabliki    3

Christopher Paul Tsonis, Fjölni    3

Emil Pálsson, FH    3

Jóhann Helgi Hannesson, Þór Ak.    3

Haukur Lárusson, Fjölni    3

Ólafur Páll Snorrason, FH    3

27 leikmenn eru með tvær stoðsendingar.