Svipta Blönduós atkvæðisrétti í veiðifélagi um Blöndu

„Við höfum mikilla hagsmuna að gæta og þótt ég hafi haft ávæning af þessu hefði átt að láta okkur vita,“ segir Arnar Þór Sævarsson, bæjarstjóri á Blönduósi, um þá ákvörðun stjórnar Veiðifélags Blöndu og Svartár að svipta bæinn atkvæðisrétti í félaginu.

Niðurstaða stjórnar veiðifélagsins var rædd í byggðaráði Blönduóss sem lýsti furðu yfir ráðstöfuninni, „sérstaklega í ljósi þess að Blönduósbær á um 11,6 prósent hluta í arðskrá félagsins,“ bókaði byggðaráðið.

„Ég furða mig nú á þessari yfirlýsingu hjá þeim,“ segir Sigurður Ingi Guðmundsson á Syðri-Löngumýri, formaður Veiðifélags Blöndu og Svartár, um ályktun byggðaráðsins.

Sigurður segir að í lögum um lax- og silungsveiði segi mjög glöggt að þeir sem eigi atkvæðisrétt séu það sem töldust lögbýli árið 1976.

Veiðirétturinn skilinn frá

„Blönduós á tvö lögbýli og ætti þess vegna að vera með tvö atkvæði en þeir virðast hafa tekið veiðiréttinn undan býlunum og fært hann undir Blönduós af einhverri vangá einhvern tímann,“ útskýrir formaðurinn sem kveðst hafa rætt málið nokkrum sinnum við bæjarstjórann og þáverandi forseta bæjarstjórnar.

Sigurður segir að meðal annars hafi verið rætt um hvort Blönduós gæti skilað veiðiréttinum á lögbýlin tvö, Hnjúka og Kleifar. Einnig hafi verið spurst fyrir um skýringar á því hvers vegna rétturinn hafi verið tekinn undan lögbýlunum en þær hafi hann ekki fengið.

„Þetta er allt í góðu og ég var búinn að leita leiða með bæjarstjóra til að koma lagi á þetta. Þess vegna undra ég mig á þessari yfirlýsingu hjá þeim því þetta kom þeim ekkert á óvart,“ undirstrikar Sigurður. „Blönduós er stærsti aðilinn í veiðifélaginu og mjög óeðlilegt að hann sé ekki með atkvæðisrétt en við getum ekkert annað en farið eftir lögum sem gilda.“

Eigum minnst eitt atkvæði segir bæjarstjórinn

Arnar Þór bæjarstjóri segir alveg öruggt að Blönduósbær eigi í það minnsta eitt atkvæði í gegn um Hnjúka. Varðandi Kleifar sé óljósara með atkvæðisréttinn því bærinn hafi tekið veiðiréttindin undan jörðinni þegar þar var stofnað nýbýli á öldinni sem leið. Þá sé hugsanlegt að bærinn eigi atkvæði í gegn um Enni og Hjaltabakka því bærinn sé byggður á hluta úr þeim jörðum.

Stjórn veiðifélagsins gefur frest til 31. ágúst til að gera athugasemdir við nýju atkvæðaskrána. „Við erum að skoða þetta í rólegheitunum og munum gefa okkur þann tíma sem við þurfum,“ segir bæjarstjórinn.