Illugi vill ekki leggja á nokkurn mann að horfa tvisvar á íslenskar fréttir

Illugi Gunnarsson, mennta- og menningarmálaraðherra, segist ekki vilja leggja á nokkurn mann að horfa á íslenskar fréttir oftar en einu sinni. Þetta sagði hann í umræðum um gagnasafn RÚV á Alþingi í gær. Þar var meðal annars rætt um hvaða ástæður gætu legið að baki því að fréttatímar RÚV eru ekki aðgengilegir á netinu nema í skamman tíma.

Illugi sagðist ekki vita hvort tæknilegar eða fjárhagslegar ástæður ráða því að þær eru aðgengilegar þennan ákveðna tíma en efaðist að nokkur hefði áhuga á að horfa oft á sömu fréttatímana. „Ekki það að maður vilji leggja það á nokkurn mann að horfa á íslenskar fréttir tvisvar eða oftar jafnvel en þó er nauðsynlegt sögunnar vegna að við gætum þess að aðgengi sé sem lengst,“ sagði hann.