Fara fram á fimm ára fangelsi: Segist ekki muna eftir árásinni

Tuttugu og þriggja ára karlmaður, sem ákærður er fyrir að hafa reynt að bana 21 árs gamalli unnustu sinni á heimili þeirra í Grafarholti í júlí, segir kvöldið allt í móðu.

Maðurinn er sakaður um að hafa veist að unnustu sinni þannig að hún féll við og sparkað í andlit hennar þar sem hún lá á gólfinu, slegið hana í andlitið og inni á baðherbergi íbúðarinnar stungið hana þremur stungum með hnífi í hnakka, háls og kvið. Konan hlaut mjög alvarlega áverka, meðal annars djúpt sár sem gekk í gegnum kviðvegg hennar, inn á kviðarhol og rifu á nýra. Áverkar á andliti hennar voru einnig umtalsverðir, en efri vör hennar rifnaði í sundur, tönn hennar brotnaði og hlaut hún sár á öðru auga.

Maðurinn segist ekki muna eftir því að hafa ráðist á unnustu sína. Þau hafi rifist í miðbæ Reykjavíkur fyrr um kvöldið og ekki farið heim saman. Þar hafi þau þó hist síðar um nóttina og rifrildið haldið áfram. Eftir árásina, sem maðurinn kveðst ekki muna eftir, segist hann hafa skorið sig á háls og reynt að taka eigið líf. Maðurinn hefur verið í meðferð á Litla-Hrauni frá árásinni.

Konan segir manninn áður hafa beitt sig ofbeldi, bæði undir áhrifum áfengis og edrú. Hún hafi haldið að hún væri að deyja og árásin hafi komið henni í opna skjöldu.

Ákæruvaldið telur að fullu sannað um tilraun til manndráps hafi verið að ræða. Maðurinn hljóti að hafa gert sér grein fyrir því að árásin hefði getað dregið konuna til dauða. Farið er fram á fimm ára fangelsisdóm yfir manninum.