Viðbrögð forystumanna til marks um fullan stuðning við „íslamafóbískan áróður“

Hreiðar Eiríksson, sem skipaði fimmta sæti á lista Framsóknarflokksins og flugvallarvina í síðastliðnum borgarstjórnarkosningum, hefur sagt sig úr flokknum.

Þetta tilkynnti hann á Facebook-síðu sinni nú fyrir skömmu. Þar segir hann viðbragðsleysi forystu Framsóknarflokksins við málflutningi framboðsins í aðdraganda kosningana hafa verið „æpandi“ og að viðbrögð formannsins, Sigmundar Davíðs Gunnlaugssonar forsætisráðherra, hafi verið þannig að „vart er hægt að skilja þau öðruvísi en fullan stuðning við íslamafóbískan áróður.“

„Þegar ég fór að starfa með Framsóknarflokknum, gerði ég það í þeirri trú að flokkurinn starfaði að heilindum í samræmi við grundvallarstefnuskrá sína. Eftir miðstjórnarfundinn fyrir viku síðan varð mér ljóst að svo er ekki. Útúrsnúningarnir og rangfærslurnar, sem forystan hefur gripið til í því skyni að réttlæta hegðun framboðsins í Reykjavík, eru klaufalegar og ósannfærandi. Forystan hefur fallið á siðferðilegu prófi og niðurstaða miðstjórnarfundarins sýnir að flokkurinn styður þann málsstað sem settur var fram í borgarstjornarkosningunum,“ segir Hreiðar í færslunni.

„Sú gleði sem ég fann til að vinna að því, sem ég taldi hugsjónir Framsóknarflokksins, hefur vikið fyrir vonbrigðum og skömm. Ég hef því sagt mig úr Framsóknarflokknum.“

Færsluna Hreiðars sjá hér að neðan.

Post by Hreiðar Eiríksson.