Vill einnig sjá fíkniefnahund á tónleikum hjá Sinfó

„Ég skil ekki vinnubrögð lögreglunar í kringum þessa hátíð og þá sérstaklega að mæta með fíkniefnahund í Hörpuna,“ sagði Björn Steinbekk Kristjánsson, framkvæmdastjóri Sónar Reykjavík, í samtali í útvarpsþættinum Harmageddon á X-inu í morgun. Þar gagnrýndi hann vinnubrögð lögreglunnar á hátíðinni um helgina.

„Þeir eiga þá að mæta með hund á alla skemmtistaði í Reykjavík um helgar eða þegar Sinfóníuhljómsveit Íslands er að spila í Hörpunni. Lögreglan í Reykjavík þarf aðeins að hugsa sig um og ræða betur við okkur áður en þeir fara í svona aðgerðir.“

Raftónlistarhátíðin Sónar fór fram um helgina í Hörpu og tókst hátíðin vel að sögn hátíðarhaldara . Þó skyggði á hátíðarhöldin fjöldi fíkniefnamála sem upp komu eða 39 talsins.

Hátíðin hófst á fimmtudag en lokakvöld hátíðarinnar var á laugardagskvöldið. Þetta er í annað skipti sem hátíðin er haldin hér á landi. Tónleikagestir voru um 3500 samkvæmt upplýsingum frá skipuleggjendum hátíðarinnar og þar af voru rúmlega eitthundrað erlendir blaðamenn.

Birni þótti athyglisvert að eigendur Hörpunnar hafi ekki sjálfir gert athugasemd við starfshætti lögreglunnar.

„Það eru haldnir hundruð tónleika á ári í húsinu og lögreglan mætir með fíkniefnahund á þessa hátíð. Við skulum ekki gera upp á milli fólks og þetta er niðurlægjandi fyrir þá listamenn sem hafa lagt mikla vinnu á sig.“

Björn er samt sem áður gríðarlega ánægður með hátíðina í heild sinni. Í viðtalinu gagnrýndi Björn fréttaflutninginn frá hátíðinni og vildi hann meina að hann hafi verið of einsleitur.

„Við erum að fá 1000 útlendinga til landsins á hátíðina og 100 erlendir fréttamenn voru einnig viðstaddir en þetta virðist ekki hafa fengið neina athygli í fjölmiðlum,“ segir Björn.

Björn fagnar umræðunni um fíkniefni og forvarnir gegn þeim.

„Það þarf samt að setja þetta í samhengi. 39 mál af 3500 manna hátíð er aðeins 1% af gestum hátíðarinnar. Við fengum aldrei  tækifæri til að tjá okkur um þetta mál um helgina.“

Vísir greindi frá þeim fíkniefnamálum sem upp komu á hátíðinni um helgina. Endurtekið var haft samband við Björn en hann neitaði að tjá sig við fréttastofu. Steinþór Helgi Arnsteinsson, upplýsingafulltrúi Sónar, sagði í viðtali við Stöð 2 og Bylgjuna að skipuleggjendur hátíðarinnar hafi verið  í nánu samstarfi við fíkniefnadeild lögreglunnar.

Björn segist alvarlega hafa íhugað það að halda aldrei aftur hátíðina Sónar í Reykjavík á sunnudeginum.

„Við erum svo lítið samfélag og nálægðin er svo mikil að svona fréttaflutningur hefur gríðarleg áhrif. Hátíðin í fyrra var erfið í framkvæmd og var mikil fíkniefnaneysla, sérstaklega á föstudagskvöldinu. Við lærðum mikið af á þeirri reynslu og fórum út í þessa hátíð með því að skipuleggja okkur betur. Við vildum endilega hafa lögregluna í húsinu en það að hafa fíkniefnahund á svæðinu þykir mér einkennileg vinnubrögð.“