Fimm fíkniefnamál á Sónar

Upp hafa komið fimm fíkniefnamál í tengslum við raftónlistarhátíðina Sónar sem nú stendur yfir í Hörpu.

Lögreglan á höfuðborgarsvæðinu hafði afskipti af einstaklingum sem grunuð voru um vörslu fíkniefna á tveggja klukkustunda tímabili skömmu fyrir miðnætti í gær.

Lögreglan sinnti einnig máli ungs manns í nótt sem kom upp í tengslum við menntaskólaball í Gullhömrum í Grafarholti. Ungi maðurinn reyndist ölvaður og til vandræða og fór ekki að fyrirmælum lögreglu og er nú vistaður í fangageymslu meðan ástand hans lagast.

Þá hafði lögreglan afskipti af sex ökumönnum sem grunaðir voru um akstur undir áhrifum áfengis eða annarra vímuefna. Einn var sviptur ökuréttindunum en aðrir reyndust undir leyfilegum mörkum og var því akstur þeirra einungis stöðvavður og bíllykar teknir í vörslu lögreglu.

Bifreið var stöðvuð í Breiðholti skömmu eftir miðnætti. Ökumaðurinn reyndist vera 16 ára og hafði því aldrei öðlast ökuréttindi. Akstur hins unga ökumanns var stöðvaður og reynt er að afgreiða mál hans með aðkomu foreldris.