„Enginn fótur fyrir ásökunum um dýraníð“

 „Það er svo margt rangt í fréttinni að það hálfa væri nóg,“ segir Jón Pétursson minkaveiðimaður og einn rekstraraðila minkahundabúsins í Helgadal, aðspurður um aðbúnað hundanna eftir að frétt birtist á Vísi og í kvöldfréttum RÚV í gær. 

Jón rekur hundabúið ásamt einum öðrum og eru fimm hundar í búinu. Hann segir kvartanir ítrekað hafa borist og í hvert skipti komi dýralæknar og aðilar frá Matvælastofnun til þess að taka út og yfirfara búið. Hann segir að allar  athugasemdir sem hafa borist verið teknar til greina og allt lagfært samstundis. Hann segir aðstöðuna uppá sitt besta, hundarnir hafi aðstöðu til þess að fara inn og út eftir hentisemi, gólfið sé upphitað, heitt vatn á staðnum og hlýtt sé í húsinu. Hundarnir hafi hlýtt, mjúkt bæli til að sofa í og líði almennt vel á þessum stað og segir hann því engan fót vera fyrir þessum ásökunum.

„Tólf búr eru í húsinu en einungis fimm hundar. Þau búr sem eru lokuð eru þau búr sem ekki eru í notkun en annars geta hundarnir farið inn og út að vild,“segir Jón. 

Hann segir þeim hafa borist kvörtun vegna óþrifnaðar og staðfestir hann að óþrifnaður hafi verið þann dag.

„Það hafði allt snjóað í kaf. Hundarnir skíta og míga úti og erfitt getur verið að þrífa þetta upp þegar saurinn frýs við jörðu. Snjórinn bráðnaði og þá barst kvörtunin. Að sjálfsögðu var þetta þrifið upp samdægurs.“

Í janúar í fyrra komu sex dýralæknar að skoða hundabúið og þrír aðilar frá Matvælastofnun. Í síðustu viku kom dýralæknir og bólusetti alla hundana. Jón segir að gerð hafi verið ein athugasemd og var hún sú að þrautabraut ætti að vera í búrunum fyrir hundana að leika sér í. Þrautabrautin hefur ekki verið sett upp en mikill snjór hefur verið í búrunum upp á síðkastið.Jón segist vera með öll tilsett leyfi og fjölmarga pappíra sem votta fyrir það að hundabúið sé í lagi. 



„Á skoðunardegi virtust allir hundar við góða heilsu og voru í ásættanlegum holdum og kátir. Flestir þeirra sóttust eftir athygli, eldri hundar virtust spræki þegar þeim var hleypt úr búrunum og sýndu ekki merki um stirðleika,“ kemur fram í bréfi Matvælastofnunar sem hann fékk eftir að þrír aðilar frá fyrrgreindri stofnun tóku mat á rekstrinum. 

Hann segir það ekki  hag neins að halda hundunum vesælum og veikum, þetta séu vinnuhundar og væri raunin sú væru hundarnir ónothæfir.

,,Þetta er tilfinningalegt mál hjá fólki að hundar séu í búrum. Ég fæ áfall þegar ég sé hund í töskum eða fötum. Hundarnir hjá okkur komast út á hverjum degi, komast út þegar þeir vilja og fá að öllum líkindum meiri hreyfingu en flest allir hundar á Íslandi," segir Jón að lokum.