"Mér finnst engin dýr eiga að upplifa svona aðstæður“ - MYNDIR

Tönju Ýr Ástþórsdóttur, ungfrú Ísland, misbauð aðstaðan á minkaveiðihundabúi í Mosfellsdal í gærkvöldi þegar hún tók meðfylgjandi símamyndir. Þá má sjá  háa snjóskafla í búrunum þar sem hundar dvelja. 

„Mér finnst engin dýr eiga að upplifa svona aðstæður,“ svarar Tanja spurð um aðkomuna þegar hún gekk framhjá búinu í gær. Myndirnar tók hún um klukkan 19.

En þeir komast inn í kofana? „Jú, þeir komast inn, sumir þeirra, en þeir eru illa á sig komnir. Það er greinilegt og það er bannað að fara illa með hunda. Það er lúga á hurðum neðst á skúrunum en sumir þeirra komast ekki yfir snjóskaflana. Einn skaflinn er alveg upp við dyrnar þannig að hundarnir þar komast ekki út úr húsinu því þetta eru risastórir skaflar.“

„Ég hef lengi vel rætt þetta mál við vini mína og fór með einum vini mínum þangað í gær og sýndi honum þessar aðstæður. Ég hef aldrei komið að þessu svona slæmu. Í hvert skipti sem ég keyri þangað þarf ég að labba yfir á til að komast að búrunum. Ég er búin að hafa samband við lögreglu og dýraeftirlitið en hef ekki fengið almennileg svör,“ segir Tanja.

„Dýr eiga skilið að fá ást og umhyggju og gott umhverfi. Engin dýr eiga skilið að líða fyrir svona. Mér misbauð en ég hef farið þangað reglulega,“ útskýrir Tanja ákveðin.

„Mér finnst ótrúlegt að fólk sem sér um þetta geti farið að sofa vitandi af dýrunum þarna í þessu umhverfi,“ segir hún jafnframt. 

Chihuahua hundurinn hennar Tönju heitir Bella. Hún varð 9 ára í desember.