Síbrotamaður dæmdur í tveggja ára fangelsi

Héraðsdómur Reykjaness hefur dæmt mann í tveggja ára fangelsi fyrir ítrekuð umferðarlagabrot, fíkniefnalagabrot og þjófnaði. Þá var hann sviptur ökuréttindum ævilangt og dæmdur til að greiða þóknun verjanda síns sem og annan sakarkostnað.

Fram kemur í dómnum að maðurinn hafi brotist inn í bifreiðar, inn á bifreiðastæði og inn í apótek auk þess sem hann gerði til raun til að brjótast inn í eina af verslunum Elko. Þá hefur maðurinn ítrekað sest undir stýri undir áhrifum ávana- og fíkniefna. Þá var hann dæmdur fyrir vörslu amfetamín sem lögreglan fann tvisvar við húsleit heima hjá manninum og í eitt skipti þegar leitað var á honum á bílastæði á höfuðborgarsvæðinu.

Maðurinn er góðkunningi lögreglunnar og hefur frá árinu 1985 verið dæmdur 35 sinnum fyrir ýmis konar afbrot. Að teknu tilliti til þess var hæfileg refsing metin sem tveggja ára fangelsisvist.