Meintur níðingur í heimaleikjabann í Eyjum

Óskar Örn Ólafsson, formaður knattspyrnudeildar ÍBV, segir að einstaklingur, sem grunaður er um kynþáttaníð í garð KR-ingsins Farid Zato í leik félaganna 31. júlí síðastliðinn, hafi ekki mætt á leik liðsins gegn FH á sunnudaginn.

Ætla má af orðum Óskars að einstaklingurinn hafi verið í heimaleikjabanni vegna háttalags síns en Óskar segir að frekari aðgerðir í málinu séu á ís þar til aganefnd KSÍ hefur úrskurðað í málinu seinna í dag.

„Við erum búnir að ganga frá þessu máli af okkar hálfu gagnvart þeim einstaklingi sem átti þarna í hlut. Starfsmaður okkar stóð við hliðina á honum og heyrði allt,“ segir Óskar Örn í samtali við Vísi.

Hann segist vera spenntur yfir því að sjá skýrslu dómaranna og bíður eftir úrskurði aganefndar KSÍ.

„Við viljum sjá hvað er í skýrslu dómaranna. Við vitum hvað gerðist og viljum sjá hvort skýrsla þeirra samræmist þeim upplýsingum sem við höfum um málið,“ segir Óskar Örn.

Eins og Vísir greindi frá í morgun þá á ÍBV yfir höfði sér 150 þúsund króna sekt vegna þessa atviks.