Innlent

„Ráðherrann hefur ávítað okkur sem höfum spurst fyrir um þetta mál“

Sunna Karen Sigurþórsdóttir skrifar
"Nú hefur rannsókn staðið yfir hátt í fjóra mánuði. Er óeðlilegt að velta fyrir sér hvenær þessari rannsókn muni ljúka?“
"Nú hefur rannsókn staðið yfir hátt í fjóra mánuði. Er óeðlilegt að velta fyrir sér hvenær þessari rannsókn muni ljúka?“ vísir/gva
Valgerður Bjarnadóttir, þingmaður Samfylkingarinnar, fór hörðum orðum um framferði Hönnu Birnu Kristjánsdóttur í lekamálinu svokallaða í pistli sem hún birti á vefsíðunni Herðubreið. Valgerður segir svör innanríkisráðherra skrítin og síðbúin og undrar sig á því hvers vegna Hanna Birna neitar að tjá sig um málið. Þá sakar hún hana um að draga málið á langinn svo hún þurfi ekki að sitja fyrir svörum fyrr en þingið hefst aftur í haust.

„Ráðherrann hefur ávítað okkur sem höfum spurst fyrir um þetta mál um að sækja að embættismönnum. Það höfum við ekki gert, enda ber ráðherrann ábyrgð á starfsemi ráðuneytisins. Nú bendir ráðherrann hins vegar á embættismenn, það er sannarlega eftirtektarvert ef það er rétt orð yfir gjörninginn,“ segir Valgerður.

Valgerður og Mörður Árnason, varaþingmaður Samfylkingarinnar, sendu Hönnu Birnu sameiginlega fyrirspurn tengdri lekamálinu og barst þeim svar frá henni síðastliðinn föstudag.

„Ég fékk tilkynningu kl 20:50 um að svarinu hefði verið útbýtt og svo var þinginu slitið kl 22:24.  – Það gefst því tækifæri til að spyrja ráðherrann nánar um svarið þegar þingið kemur saman í september,“  segir Valgerður sem segir svör Hönnu Birnu skrítin og seinbúin.

„Í svarinu kemur fram að ekki er til formlegt minnisblað í ráðuneytinu en það er til samantekt. Ég hélt nú reyndar að minnisblöð væru ekki formleg, heldur einmitt minnisblöð sem í eðli sínu eru varla formleg í stjórnsýslunni.“

Valgerður gagnrýnir Hönnu Birnu fyrir að upplýsa ekki almenning um það hver hafi stjórnað rannsókn ráðuneytisins eða hvað hafi verið til skoðunar.

„Að lokum segir í svarinu að ráðherrann eða aðrir geti ekki tjáð sig um málið á meðan rannsókn stendur yfir. Reyndar er ekkert sem bannar einum né neinum að segja eitthvað efnislega um málið, og reyndar er forvitnilegt hvers vegna ráðherrann kýs að gera það ekki.“

„Þetta er vissulega alvarlegt mál, en ekki mjög viðamikið – eða hvað? Nú hefur rannsókn staðið yfir hátt í fjóra mánuði. Er óeðlilegt að velta fyrir sér hvenær þessari rannsókn muni ljúka?“ segir Valgerður, en sagt var á vef innanríkisráðuneytis í byrjun febrúar að öll gögn er varða málið hafi verið afhent ríkissaksóknara.


Tengdar fréttir

Krefjast þess að Hanna Birna segi af sér

Ungir jafnaðarmenn samþykktu í dag ályktun af miðstjórn um að Hanna Birna Kristjánsdóttir, innanríkisráðherra, eigi að segja af sér ráðherraembætti.

Einkamál útlendinga birt án skýrra heimilda

Innanríkisráðuneytið hefur hafið birtingu á úrskurðum sínum um málefni útlendinga. Ekki er skýr lagaheimild fyrir birtingunni og viðkvæmar persónuupplýsingar birtast þrátt fyrir að nafnleyndar sé gætt. Persónuvernd vill að vandað sé til verka.

Máli Tony Omos enn frestað

Eftir stutta fyrirtöku var máli hans frestað til 7.apríl næstkomandi. Taldi lögmaður hans að nauðsynlegt væri að bíða eftir niðurstöðum úr rannsókn lögreglu til frekari gagnaöflunar.

Lekamálið ljótur pólitiskur leikur að mati Hönnu Birnu

Hart var sótt að innanríkisráðherra á þinginu nú rétt í þessu vegna lekamálsins svokallaða. Hanna Birna Kristjánsdóttir ætlar að tjá sig um það síðar en gaf í skyn að það snérist um aðför að sér.




Fleiri fréttir

Sjá meira


×