Drukkinn farþegi ógnaði áhöfn

Flugvél á leið frá Kúbu til Moskvu lenti um helgina á Keflavíkurflugvelli vegna drukkins farþega.

Farþeginn, kona á þrítugsaldri, kom ölvuð um borð og tók á það ráð að áreita aðra farþega. Ákvörðun var tekin um að selja henni ekki áfengi en tók hún þá rommflösku úr pússi sínu og fór að drekka úr henni. Konan brást illa við þegar áhöfnin óskaði eftir að fá að geyma flöskuna og sýndi þeim ógnandi tilburði. Í kjölfarið var ákvörðun tekin um að lenda vélinni á Íslandi.

Lögreglunni á Suðurnesjum var gert viðvart og handtók konuna. Konan hélt ferð sinni áfram þegar hún var komin til ráðs og rænu.