Hasarinn að hefjast í flugeldasölunni

„Þetta fer svona hægt af stað fyrstu dagana en hasarinn byrjar seinnipartinn í dag og er svona mestur á morgun. Íslendingum finnst gaman að fara á gamlársdag og kaupa sína flugelda,“ segir Jónas Guðmundsson hjá Slysavarnarfélaginu Landsbjörg aðspurður hvernig flugeldasalan gangi hjá björgunarsveitunum.

Langstærsti söludagurinn er á morgun og eru flestir sölustaðir opnir þá frá 9-16. Í einhverjum tilfellum úti á landi opnar þó klukkan 10 en svo er opið til klukkan 22 í kvöld.

Hvað fá björgunarsveitirnar miklar tekjur af flugeldasölunni ár hvert?

„Við höfum nú ekki gefið upp hvað við fáum nákvæmlega í tekjur af þessu en þetta er auðvitað aðalfjáröflun sveitanna. Ætli það komi ekki rúmlega helmingur þess fjármagn sem þarf til að reka björgunarsveitirnar í gegnum flugeldasöluna svo þú sérð að þetta er gríðarlega mikilvæg fjáröflun.“

Jónas segir að björgunarsveitirnar finni vel fyrir stuðningi almennings á þessum árstíma:

„Við erum auðvitað gríðarlega þakklát fyrir það og finnum að fólk er ánægt með að geta stutt svona við bakið á okkur. Við segjum gjarnan að þjóðin geti treyst á okkur allan ársins hring en í kringum áramót þurfum við að treysta á þjóðina. Við höfum það auðvitað fram yfir einkaaðila að við erum í fjáröflun.“

Aðspurður hvort að fólk sé að kaupa mikið magn af flugeldum segir Jónas að það sé mjög misjafnt.

„Flestir kaupa nú bara hóflega en auðvitað eru alltaf einhverjir sem hafa sérstaklega gaman að þessu og kaupa meira. Við bjóðum náttúrulega gott úrval og Kappa-og Bardagaterturnar eru til dæmis mjög vinsælar. Maður fær alveg fínustu flugeldasýningu úr einni þannig tertu.“