Stjórnarandstaðan undrast forgangsröðun ríkisstjórnarinnar

Þingmenn stjórnarandstöðunnar undruðust margir á Alþingi í dag að bættur fjárhagur ríkissjóðs verði ekki nýttur til að efla innviði samfélagsins eins og heilbrigðiskerfið í stað þess að hraða greiðslum vegna skuldaniðurfærslu húsnæðislána. Forystumenn stjórnarflokkana segja hraðari greiðslu leiðréttingarinnar spara heimilunum miklar vaxtagreiðslur.

Þingmenn ræddu margir leiðréttinguna svo kölluðu á Alþingi í dag. Katrín Jakobsdóttir formaður Vinstri grænna segir það hafa vakið athygli að aðgerðunum hefði verið flýtt vegna bættrar stöðu ríkissjóðs.

„Og þá hljóta auðvitað að vakna spurningar um forgangsröðun enn og aftur. Ef afkoma ríkissjóðs er betri en menn höfðu áætlað er spurningin hvernig hún er nýtt. Og á sama tíma og þessi aðgerð er kynnt er hér lagt fram fjáraukalagafrumvarp þar sem ekki er gert ráð fyrir auka fé í rekstur Landsspítalans, sem ég hef þó ekki heyrt annað en að fulltrúar allra flokka hafi talað hér um sem algert forgangsmál,“ sagði Katrín á Alþingi í dag.

Þarna væri um milljarða að ræða sem vekti undrun að færu ekki til að styrkja innviði samfélagsins og tóku margir þingmenn undir það.

Sigmundur Davíð Gunnlaugsson forsætisráðherra sagði sameiginlegar aðgerðir ríkisstjórnarinnar hafa leitt til þess að svigrúm væri að skapast m.a. til að bæta stöðu Landsspítalans.

„Það hefur engin áhrif á hitt,  að það skuli vera hægt að fjármagna skuldaleiðréttinguna á enn hagkvæmari hátt en áður leit út fyrir, er að sjálfsögðu í þágu heimilanna. En það er líka í þágu ríkisins. Veikir ekki stöðu okkar á öðrum sviðum eða möguleika okkar á að byggja upp í heilbrigðiskerfinu. Þvert á móti, það styrkir hana,“ sagði forsætisráðherra.

Fréttastofan sendi fyrirspurn á alla formenn og þingflokksformenn stjórnarandstöðuflokkanna um hvort þau hefðu sótt um leiðréttinguna. Formenn og þingflokksformenn Samfylkingarinnar og Vinstri grænna  staðfestu að þau hefðu sótt um, formaður og þingflokksformaður Bjartrar framtíðar sögðust af prinsippástæðum ekki fjalla um fjármál fjölskyldu sinnar opinberlega.   Þingflokksformaður Pírata sótti ekki um leiðréttinguna persónulega en tekur þátt í að greiða af húsnæðisláni sem sótt var um fyrir.

Til að gæta allrar sanngirni sótti sá sem hér skrifar um leiðréttinguna.