Framkvæmdir við nýjan Landspítala hefjast á þessu kjörtímabili

Flokksráðsfundur Sjálfstæðisflokksins fór fram á Grand Hótel í dag. Fundurinn hófst á ræðu Bjarna Benediktssonar og kom hann víða við. Hann sagði Ísland vera komið upp úr öldudal kreppunnar og að nú væri hafin sókn í efnahagsmálum þjóðarinnar. Þá sagði hann gjaldeyrishöftin valda ómældu tjóni fyrir íslenskt atvinnulíf og að von væri á tíðindum um afnám þeirra.

„Eftir því sem þessari vinnu vindur fram, þá get ég sagt ykkur það sem ég stend hér, að ég hef aldrei verið jafn sannfærður eins og í dag um að við munum ná markverðum árangri á næstu mánuðum í þessum málum,“ sagði Bjarni.

Þá sagði Bjarni að ríkisstjórnin hefði forgangsraðað í þágu heilbrigðismála og myndi gera það áfram.

„Það er til dæmis ljóst sem öllum varðar að húsnæði Landspítalans er að mörgu leyti úrelt. Það er ekki miðað við þarfir nútímalæknisþjónustu og húsnæðiskostnaðurinn beinlínis stendur í vegi ákveðinnar hagræðingar sem þarf að ná fram í rekstrinum og bættri þjónustu,” sagði Bjarni.

Kristján Þór Júlíusson, heilbrigðisráðherra, sagði þetta um byggingu nýs Landspítala á aðalfundi Læknafélagsins í september:

„Ég geri mér vonir um að tillögur um það hvernig best sé staðið að málum Landspítalans líti dagsins ljós á fyrri hluta komandi árs.”

Kemur ríkisstjórnin til með að leggja fram áætlun um byggingu nýs Landspítala á næsta ári?

„Ég skal ekki segja nákvæmlega hvenær okkar áætlanir muni birtast. En ég tel vel raunhæft, meðal annars í ljósi batnandi afkomu ríkissjóðs, við sjáum það í arði af fjármálastarfsemi í landinu, við sjáum það í álagningu lögaðila og einstaklinga. Þess vegna segi ég það hér í dag, að það er raunhæft og við ætlum að láta til skarar skríða, með að hefja framkvæmdir á þessu kjörtímabili,” sagði Bjarni.