Innlent

Vegur um Teigsskóg varla fyrr en árið 2019

Kristján Már Unnarsson skrifar
Hreinn Haraldsson vegamálastjóri.
Hreinn Haraldsson vegamálastjóri. Stöð 2/Egill Aðalsteinsson.
Vegagerðin hyggst ekki óska eftir sérlögum frá Alþingi vegna vegagerðar um Teigsskóg en fer í staðinn fram á að eldra umhverfismat verði endurskoðað. Þannig vonast vegamálastjóri til að fá framkvæmdaleyfi innan átján mánaða og að vegurinn verði tilbúinn árið 2019. Þetta kom fram í hádegisfréttum Bylgjunnar, sem heyra má hér að ofan.

Hanna Birna Kristjánsdóttir, ráðherra vegamála, sagði í þingræðu fyrir þremur vikum að vegagerð um Teigsskóg væri í stjórnsýsluflækju og sagði sérlög koma til greina til að höggva á hnútinn. Ákveðið var að kanna hvernig einfaldast væri að greiða úr flækjunni og voru þrír kostir til skoðunar, að sögn Hreins Haraldssonar vegamálastjóra; endurupptaka á fyrra umhverfismati, sérstök lagasetning frá Alþingi og svo loks að Vegagerðin kærði þá niðurstöðu Skipulagsstofnunar í síðasta mánuði að hafna nýju umhverfismati.

„Það hefur verið ákveðið núna að fara í svokallaða endurupptökuleið,” sagði Hreinn. Þetta þýðir að óskað verður eftir því við Skipulagsstofnun að átta ára gamalt umhverfismat verði endurskoðað, vegna nýrrar veglínu sem Vegagerðin leggur til um Teigsskóg. En hvað tæki langan tíma að fá niðurstöðu? 



Vegamálastjóri segir að lögfræðingar telji að það taki eitt til eitt og hálft ár þar til unnt verði að sækja um framkvæmdaleyfi til sveitarstjórnar. En hvenær gætu framkvæmdir þá hafist?

Ef allt gengur eftir, á árinu 2016, svarar Hreinn. Hann tekur fram að eftir sé að hanna veginn og bjóða út verkið, hver svo sem endanleg veglína verður.

Veglínur sem Vegagerðin skoðar um framtíðarlegu Vestfjarðavegar um Gufudalssveit.Kort/Vegagerðin.
Vegamálastjóri áætlar að framkvæmdir tækju þrjú ár, þetta væri mikið verk og myndi sennilega kosta um sjö milljarða króna. 

-Verklok kannski 2019? 

„Já. Ég hugsa að við myndum þykjast góð ef það væri kominn þarna endanlegur opinn vegur á því ári,” sagði Hreinn Haraldsson.


Tengdar fréttir

Vilja skoða sérlög á vegarlagningu um Teigsskóg

Skipulagsstofnun hafnar tillögu Vegagerðarinnar um veg um Teigsskóg. Forseti Alþingis vill að þingið setji lög um vegarlagninguna. Formaður Byggðastofnunnar tekur undir. Skipulagsstofnun bundin að lögum, segir talsmaður stofnunarinnar.

Telur breyttan veg ekki leyfa nýtt umhverfismat

Framtíðarlega Vestfjarðavegar um Gufudalssveit er í algerri óvissu eftir að Skipulagsstofnun gerði Vegagerðinni ljóst að hún myndi ekki fallast á að vegur um Teigsskóg færi í nýtt umhverfismat með breyttri veglínu.

Hanna Birna segir Teigskóg í stjórnsýsluflækju

Þingmenn eru sammála um að það þoli enga bið að finna leið til lausnar vegabóta á sunnanverðum Vestfjörðum. Innanríkisráðherra segir til greina að setja lög vegna málsins.

Vegagerðin áfrýjar úrskurði

Vegagerðin hefur áfrýjað úrskurði Skipulagsstofnunar um að hafna veglínu um Teigsskóg. Ólína Þorvarðardóttir, þingmaður Samfylkingarinnar, gagnrýnir stefnu Vegagerðarinnar og telur áfrýjun ekki hjálpa málinu.

Vegur um Teigsskóg mikil náttúruspjöll

"Stjórn Fuglaverndar hvetur stjórnvöld til að fara að öllu með gát og skoða fleiri möguleika varðandi vegagerð í Gufudalssveit,“ segir í ályktun Fuglaverndar.

Vegagerð hefjist um Teigsskóg árið 2016

Vegamálastjóri vonast til að geta hafið vegagerð um Teigsskóg árið 2016 með því að fá gamla umhverfismatið, sem búið var að hafna, endurskoðað vegna breyttra forsendna.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.