Innlent

Telur breyttan veg ekki leyfa nýtt umhverfismat

Kristján Már Unnarsson skrifar
Hreinn Haraldsson vegamálastjóri og Hanna Birna Kristjánsdóttir innanríkisráðherra skoðuðu Teigsskóg í fyrrasumar.
Hreinn Haraldsson vegamálastjóri og Hanna Birna Kristjánsdóttir innanríkisráðherra skoðuðu Teigsskóg í fyrrasumar. Fréttablaðið/Daníel

Framtíðarlega Vestfjarðavegar um Gufudalssveit er í algerri óvissu eftir að Skipulagsstofnun gerði Vegagerðinni ljóst að hún myndi ekki fallast á að vegur um Teigsskóg færi í nýtt umhverfismat með breyttri veglínu.

Í fréttum Stöðvar 2 í kvöld var leiðin upp á Ódrjúgsháls sýnd sem lýsandi dæmi um vandann, en þar er annar af tveimur fjallvegum á leiðinni. Þarna eru hlykkjóttir og mjóir malarvegir með blindhæðum og hengiflugi á köflum, sem jafnvel á sumrin virkar glæfralegt, hvað þá í hálku og myrkri að vetri.

Leiðin sem Vegagerðin vill fara með Vestfjarðaveg til að losna við fjallvegina um Hjallaháls og Ódrjúgsháls.

Nú þegar séð er fram á verklok í vegagerð vestar í Barðastrandarsýslum, um Kjálkafjörð og Kerlingarfjörð, þykir orðið aðkallandi að fá niðurstöðu um hvernig síðustu þrjátíu kílómetrarnir af Vestfjarðavegi um Gufudalssveit verða byggðir upp með bundnu slitlagi. Til að losna við hálsana tvo hafa sveitarstjórnir á Vestfjörðum ásamt Vegagerðinni viljað láglendisveg um Teigsskóg ásamt þverun tveggja fjarða en mætt andstöðu landeigenda og umhverfisverndarsamtaka. 

Leið um Teigsskóg var hafnað með Hæstaréttardómi fyrir fimm árum en núverandi ráðherra vegamála, Hanna Birna Kristjánsdóttir, fól Vegagerðinni engu að síður í fyrra að fara með nýja veglínu í umhverfismat. Fyrri tillaga gerði ráð fyrir að allt að tólf prósent af skóglendinu myndi raskast en ný tillaga, sem flytur veglínuna upp fyrir skóginn að austanverðu, og niður fyrir hann að vestanverðu, gerir ráð fyrir að eitt prósent af skóginum raskist, og segir Hreinn Haraldsson vegamálastjóri að slíkt teljist óveruleg röskun. 

Ásdís Hlökk Theodórsdóttir, forstjóri Skipulagsstofnunar, segir hins vegar ekki unnt að líta á þessa nýju veglínu sem nýja framkvæmd og þar sem þegar sé búið að hafna leið um Teigsskóg telji stofnunin ekki lagalegar heimildir til að hefja nýtt matsferli. Stofnunin hafi hinsvegar bent Vegagerðinni á aðrar leiðir, eins og að óska eftir endurskoðun á umhverfismatinu vegna breyttra forsendna. 

Vegamálastjóri segist nú ætla að ræða við ráðuneytið um næstu skref.

Húsmæður á Vestfjörðum mótmæltu með búsáhöldum á frægum fundi á Patreksfirði haustið 2011 þeirri stefnumörkun Ögmundar Jónassonar, fyrrverandi innanríkisráðherra, að hafna láglendisleið um Teigsskóg. Myndir/Egill Aðalsteinsson.

Þetta mál brennur einna brýnast á íbúum þorpanna á sunnanverðum Vestfjörðum; Patreksfjarðar, Tálknafjarðar og Bíldudals, en hversu lengi þeir mega búa við malarvegina hlykkjóttu er núna í fullkominni óvissu.


Tengdar fréttir

Brú yfir Kjálkafjörð opnuð fyrir verslunarmannahelgi

Einn vestfirsku fjarðanna, Kjálkafjörður, er að lokast þessa dagana með vegfyllingu, og það var rétt eins og opnað væri fyrir flóðgátt þegar sjónum var í fyrsta sinn hleypt undir nýju brúna yfir fjörðinn.

Hanna Birna til fundar við Vestfirðinga um vegamál

Nýr ráðherra vegamála, Hanna Birna Kristjánsdóttir, hefur fallist á að funda með Vestfirðingum um hvort Vestfjarðavegur verði lagður um Teigsskóg, og að snúið verði við synjun Ögmundar Jónassonar.

Allt annað en Teigsskóg, segir Ögmundur

Ögmundur Jónasson innanríkisráðherra hefur fallið frá því að láta Vestfjarðaveg liggja yfir hálsana tvö í Gufudalssveit og er tilbúinn að skoða alla aðra kosti nema þann að fara í gegnum Teigsskóg. Kristján Möller, fyrrverandi samgönguráðherra, segir að leiðin um Teigsskóg sé sú eina færa.

Fundarmenn gengu á dyr á Patreksfirði

Stærstur hluti þeirra tvö til þrjúhundruð manna sem mættu til fundar við Ögmund Jónasson innanríkisráðherra á Patreksfirði í dag gengu á dyr þegar um hálftími var liðinn. Á fundinum var fjallað um þá ákvörðun Ögmundar að láta Vestfjarðarveg fara yfir tvo ása, fremur en í gegnum Teigsskóg.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.