Vilhjálmur Hjálmarsson látinn

Vilhjálmur Hjálmarsson, bóndi og fyrrverandi þingmaður og ráðherra lést í dag, 14. júlí, á heimili sínu Brekku í Mjóafirði, 99 ára að aldri. Hann fædd­ist á Brekku 20. sept­em­ber 1914, son­ur Hjálmars Vilhjálmssonar og Stefaníu Sigurðardóttur.

Vilhjálmur var kvæntur Önnu Margréti Þorkelsdóttur, sem lést 21. apríl 2008. Þau eignuðust fimm börn; Hjálmar (látinn 2011), Pál, Sigfús Mar, Stefán og Önnu. Barnabörn Vilhjálms og Margrétar eru 18, barnabarnabörnin 35, barnabarnabarnabörnin fimm og tvö á leiðinni.

Vilhjálmur lauk héraðsskólaprófi frá Laugarvatni 1935. Hann stundaði búskap í um 30 ár, kenndi við barnaskólann í Mjóafirði og sinnti auk þess ýmis konar félagsmálastörfum. Vilhjálmur sat lengi á Alþingi fyrir Framsóknarflokkinn, fyrst árið 1949, og gegndi embætti menntamálaráðherra 1974-1978.

Þegar þingsetu lauk árið 1979 tóku ritstörf við. Samtals komu út eftir hann 24 bækur sem hann skrifaði sjálfur og þrjár sem hann átti hlutdeild í. Sú síðasta, Örnefni í Mjóafirði, kemur út þann 20. september n.k. en þá hefði Vilhjálmur átt 100 ára afmæli.